ԵՐԵՎԱՆ, 29 օգոստոսի — Sputnik. ԱԺ «Իմ քայլը» խմբակցությունը և դատական համակարգը հայտնվել են դժվար կացության առաջ. «Իմ քայլը» շատերին առաջարկել է դառնալ ԲԴԽ անդամ, հրաժարվել են։ Այս մասին գրում է «Ժողովուրդ» օրաթերթը։
«ՀՀ Բարձրագուն դատական խորհրդի 2 անդամի տեղը դեռեւս շարունակում է թափուր մնալ: Դատական օրենսգրքի համաձայն` պետք է ԲԴԽ թեկնածուին ընտրելիս հաշվի առնեն գենդերային հարցը, ինչպես նաեւ վարչական մասնագիտացում ունենալու հիմքը: Եւ այս չափանիշներին համապատասխանում է միայն Վճռաբեկ դատարանի քաղաքացիական և վարչական պալատի դատավոր Ռուզաննա Հակոբյանը»,–գրում է թերթը:
«Ժողովուրդի» տեղեկություններով` Ռուզաննա Հակոբյանն իր մտերմիկ շրջապատում հայտարարել է, որ հրաժարվում է հետ վերադառնալ Բարձրագույն դատական խորհուրդ, չի ուզում այլեւս դառնալ ԲԴԽ անդամ: Ու եթե նա առաջիկայում որոշի ինքնաբացարկ հայտնել, դատական համակարգում թեկնածուի փնտրտուք կսկսվի:
Հիշեցնենք, որ օգոստոսի 16–ին դատավորների արտահերթ ընդհանուր ժողով էին գումարել, որպեսզի ԲԴԽ դատավոր ընտրեին։ Սակայն նիստը չկայացավ, քանի որ քվորում չկար։
Մինչ այդ ԲԴԽ դատավոր ընտրված Նախշուն Տավարացյանը հուլիսի 11-ին դատավորների ընդհանուր ժողովում երդվեց որպես ԲԴԽ անդամ: Դրանից հետո, սակայն, Տավարացյանի լիազորությունները դադարեցնելու պահանջ էին ներկայացրել ԲԴԽ անդամներ Գրիգոր Բեքմեզյանը, Հայկ Հովհաննիսյանն ու Լիպարիտ Մելիքջանյանը։ Տավարացյանի լիազորությունների դադարեցման պահանջով ներկայացրած դիմումը, սակայն, Բարձրագույն դատական խորհրդը հուլիսի 19-ին մերժել էր՝ որոշելով, որ նա կշարունակի իր գործունեությունը։ Նույն օրը, սակայն, հայտնի դարձավ, որ Տավարացյանն ինքը հրաժարականի դիմում է ներկայացրել, որն էլ ընդունվել էր։
Դատական բարեփոխումների անցնցում զարգացումներն են միայն գրանցում հաջողություն. ԲԴԽ–ի կոչը
