ԵՐԵՎԱՆ, 25 հոկտեմբերի – Sputnik, Լև Ռիժկով. «Պրոմտեխնոլոգիա» ընկերությունը ոչ մի դեպքում չէր ցանկանա տենդերի ձախողման հետևանքով փչացնել հարաբերությունները Հայաստանի հետ։ Sputnik Արմենիայի հետ զրույցում այս մասին ասաց ընկերության ներկայացուցիչը։
«Մենք ոչ մի դեպքում չենք ուզում փչացնել հարաբերությունները կամ դադարել աշխատել տարածքաշրջանում», – ասաց նա։
Բազմամիլիոնանոց գործարքով զենքի առաքման մրցույթը պետք է տեղի ունենար այս ամառ, սակայն Հայաստանի պաշտպանության նախարարությունը չեղարկել է ռուսական ընկերության հայտը բանկային երաշխիք հանդիսացող գումարը չվճարելու պատճառով։ Միաժամանակ Հայաստանի քննչական կոմիտեում քրեական գործ է հարուցվել «ծառայության նկատմամբ անփույթ վերաբերմունքի» փաստով։
Նրա խոսքով` ORSIS ընկերությունը արտադրանքի մեծ տեսականի է մատակարարել Հայաստան (փամփուշտներ, օպտիկա, Т-5000 հրացաններ)։
Sputnik Արմենիայի զրուցակիցը չպարզաբանեց` ինչ ապրանքի մասին է խոսք եղել հենց այս տենդերի դեպքում, քանի որ դա փակ տեղեկություն է։
«Մենք չգիտենք` ինչու է տենդերը ձախողվել։ Մենք էլ կուզեինք իմանալ` ինչ է եղել, ու ինչու են ձեռնարկվել պայմանավորվածություններին հակասող քայլեր», – ասաց Sputnik Արմենիայի զրուցակիցը` հույս հայտնելով, որ իրավիճակը դրական հանգուցալուծում կստանա։
Նա ընդգծեց, որ ընկերությունը ոչ մի դեպքում չէր «ցանկանա հրաժեշտ տալ Հայաստանին» ու նախկինի պես կատարում է իր պարտականությունները գործող մի շարք պայմանագրերով, որոնք նախկինում են կնքվել։
ORSIS–ի ներկայացուցչի խոսքով` տարածաշրջանում ռուսական զենքը լուրջ մրցակիցներ չունի։
«Կա այլընտրանքային չինական զենք, սակայն որակի առումով այն երբեք չի համեմատվի ռուսականի հետ։ Եթե այդպիսի բան տեղի ունենա, ապա դա կլինի շատ հեռու ապագայում»,–ասաց նա։
Հոկտեմբերի 24–ին Ռուսաստանի արդյունաբերության և առևտրի նախարարությունը ՌԴ ԱԳՆ–ին էր փոխանցել ՀՀ պաշտպանության նախար Դավիթ Տոնոյանին ուղղված նամակը, որում խնդրում էին նախարարին պարզաբանել զենքի տենդերի ձախողման շուրջ ստեղծված իրավիճակը։ Տարիներ շարունակ ընկերությունը զենք, փամփուշտներ ու օպտիկա է մատակարարել, իսկ հետո հայտնվել է «Հայաստանի ԶՈւ–ի մատակարարների սև ցուցակում»։
«ORSIS–ի գործը». ռուսական զինագործական ընկերությունը դատի չի տվել Հայաստանի ՊՆ-ին
