ԵՐԵՎԱՆ, 29 հուլիսի — Sputnik. Հայաստանը պատրաստ է շարունակել պահպանել 1994 թվականից գործող հրադադարի ռեժիմը Ղարաբաղյան հակամարտության գոտում ու Ադրբեջանի հետ սահմանին։ The Jerusalem Post-ի հետ հարցազրույցում ասել է ՀՀ արտգործնախարար Զոհրաբ Մնացականյանը։
Ադրբեջանի հետ սահմանին՝ Տավուշի ուղղությամբ վերջերս տեղի ունեցած էսկալացիայի ֆոնին իրավիճակը շարունակում է լարված մնալ։ Պաշտոնական լրահոսը գրեթե ամեն օր հայտնում է նոր կրակոցների մասին։ Երկու օր առաջ ադրբեջանցի դիպուկահարի փամփուշտից հայ պայմանագրային զինծառայող է զոհվել։
Մնացականյանի խոսքով՝ Հայաստանն ի տարբերություն Ադրբեջանի համաձայնել է հրադադարի ռեժիմի ամրապնդմանն ուղղված միջազգային միջնորդների բոլոր առաջարկությունների հետ․խոսքն առաջնագծում միջազգային դիտորդների թվի ավելացման ու միջադեպերի հետաքննման մեխանիզմներ ներդնելու մասին է։
«Հայաստանը շարունակում է առաջ տանել էսկալացիայի ռիսկերի նվազեցման այս և այլ միջոցները», - ավելացրել է նախարարը։
Հիշեցնենք, որ հուլիսի 12–ից իրավիճակը սրվել էր հայ–ադրբեջանական սահմանի Տավուշի հատվածում։ Հուլիսի 12–ին` ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր էին արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել էին իրենց դիրքեր:
Ադրբեջանում անզգուշության հետևանքով սահմանապահ ծառայության զինվոր է մահացել
Դրանից հետո հակառակորդը պարբերաբար վերսկսում էր գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Պաշտոնական տվյալներով՝ Ադրբեջանն ունի 13 զոհ, վիրավորների մասին որևէ բան չի հաղորդվում, իսկ հայկական կողմը 5 զոհ ունի, 36 վիրավոր (ևս մեկը խաղաղ բնակչությունից)։
