ԵՐԵՎԱՆ, 19 նոյեմբերի – Sputnik. Առաջիկա օրերին կառավարությունում կադրային կտրուկ փոփոխություններ են սպասվում։ «Հրապարակ» թերթը գրում է, որ տեղեկություններ կան, որ վարչապետ Նիկոլ Փաշինյանը որոշել է կառավարության 80 տոկոսը փոխել, որպեսզի հանրության մոտ սպասումների հույս արթնացնի և ցույց տա, որ սկսել է իրականացնել իր ճանապարհային քարտեզը։
«Փաշինյանը գործարք է առաջարկել «Իմ քայլը» խմբակցությանը՝ հրավիրել է իր մոտ և ասել՝ ի՞նչ տամ ձեզ, որ մնաք կողքիս, չմիանաք վարչապետի անվստահությունը պահանջողներին, չլքեք թիմը։ Պատգամավորներն ասել են՝ թույլ տուր մենք ձևավորենք կառավարության կազմը։ Եվ «Իմ քայլը» խմբակցությունն ու ԱԺ հանձնաժողովները հիմա քննարկումների մեջ են, թե ում ներկայացնեն նախարարների թեկնածու»,–գրված է թերթում։
Ըստ այդմ, ԱԺ առողջապահության հանձնաժողովը առողջապահության նախարարի թեկնածու է առաջարկել ԱԺ փորձագետ, գիտությունների թեկնածու Դավիթ Մելիք-Նուբարյանին, պաշտպանության հանձնաժողովը` պաշտպանության նախարարի համար` Անդրանիկ Քոչարյանին, իսկ գիտության, կրթության, մշակույթի հանձնաժողովը` ԿԳՄՍ նախարար՝ Արևիկ Անափիոսյանին։ Թերթի տեղեկություններով` Փաշինյանը հակված չէ նշանակել Անդրանիկ Քոչարյանին, Պնախարարի ամենահավանական թեկնածուն համարվում է Վաղարշակ Հարությունյանը։ Իսկ Արևիկ Անափիոսյանը «Հրապարակի» հետ զրույցում չի հերքել իր` նախարար նշանակվելու լուրը, բայց ասել է, որ տեղյակ չէ:
Հիշեցնենք՝ նոյեմբերի 16–ին ՀՀ վարչապետ Նիկոլ Փաշինյանն ԱԺ–ում հայտարարեց, որ ՀՀ արտաքին գործերի նախարարին աշխատանքից ազատելու որոշում է կայացրել։ Կարճ ժամանակ անց ԱԳՆ խոսնակը հայտնեց, որ Զոհրաբ Մնացականյանը հրաժարականի դիմում է ներկայացրել և հրապարակեց նրա ձեռագիր դիմումը։
Իսկ ԱԻ նախարար Ֆելիքս Ցոլակյանը հրաժարականի դիմում ներկայացրեց նոյեմբերի 17–ին։
Նշենք, որ պաշտոնյաների ու պատգամավորների հրաժարականները սկսվել են նոյեմբերի 9-ին Հայաստանի, Ռուսաստանի ու Ադրբեջանի նախագահների եռակողմ հայտարարությունից հետո։
