ԵՐԵՎԱՆ, 29 դեկտեմբերի - Sputnik. Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը շուրջ 20 րոպե վարչապետ Նիկոլ Փաշինյանի հետ կայացած հանդիպումից հետո լրագրողներին ասաց, որ երկրում ճգնաժամը շարունակվում է։
«Ես ներկայացրել եմ ԼՀԿ մոտեցումը, նա` իր մոտեցումը։ Ես էլ ասացի, որ մենք իր մոտեցմանը դեմ ենք», – ասաց Մարուքյանը։
Խմբակցության ղեկավարը ներկայացրել է ԼՀԿ դիրքորոշումը, ըստ որի` Փաշինյանը պետք է հրաժարական տա, խորհրդարանը ընտրի նոր վարչապետ, ստեղծվի անցումային կառավարություն, ապա լինեն խորհրդարանական ընտրություններ։ Իսկ գործող վարչապետը առաջարկել է` ինքը մնա պաշտոնում և կազմակերպի խորհրդարանական ընտրություններ։
«Մեր առաջարկով խորհրդարանը պետք է ընտրի նոր վարչապետ, ձևավորվի անցումային կառավարություն վարչապետի հետ կոնսենսուսի հասած ուժերից, հաջողություն հասած մարդկանցից։ Այս բոլորով կայունացում ենք երկիրը և նախապատրաստում ընտրությունների։ Բայց վարչապետը առաջարկում է` ինքը մնա իր պաշտոնում, այդպես գնանք խորհրդարանական ընտրությունների», – ասաց Մարուքյանը։
Նա վերահաստատեց, որ Փաշինյանի հրաժարականի դեպքում ինքն առաջադրվելու է վարչապետի պաշտոնում։
«Չեմ բացառում, որ Գագիկ Ծառուկյանն էլ առաջադրվի։ Առանց ԼՀԿ և ԲՀԿ համաձայնության` այս խորհրդարանը չի կարող ցրվել», – ասաց ԼՀԿ ղեկավարը։
Ավելի վաղ Փաշինյանը հանդիպել էր Գագիկ Ծառուկյանի հետ, որը նույնպես պահանջել էր նրա հրաժարականը։
Հիշեցնենք, որ ԱԺ փոխնախագահ Ալեն Սիմոնյանն այսօր հայտնել էր` Ծառուկյան–Փաշինյան հանդիպումը տեղի է ունենալու Նիկոլ Փաշինյանի առաջարկած՝ արտահերթ խորհրդարանական ընտրությունների հնարավորությունը քննարկելու շրջանակում։ Նման հանդիպում է կայանալու նաև ԼՀԿ–ի և ՀԱԿ–ի հետ։
ՀՀ ազգային ժողովի «Իմ քայլը» խմբակցության ղեկավար Լիլիթ Մակունցն էլ այսօր լրագրողներին ասել էր, որ հնարավոր է` Փաշինյանը հնարավոր է` հանդիպում ունենա ԱԺ 3 խմբակցությունների ղեկավարների հետ։
