ԵՐԵՎԱՆ, 2 մարտի - Sputnik. Ժամանակը ցույց է տվել, որ խորհրդարանական կառավարման տարբերակը բազմաթիվ խնդիրներ է առաջացնում պրակտիկայում։ Այսօր Ազգային ժողովում նման տեսակետ հայտնեց ԱԺ փոխնախագահ Ալեն Սիմոնյանը` մեկնաբանելով ՀՀ վարչապետ Փաշինյանի հայտարարությունը` Սահմանադրական փոփոխությունների անհրաժեշտության ու խորհրդարանականից կիսանախագահական կառավարման ձևի անցնելու մասին։
«Այն իրավիճակները, որին մենք հաճախ առնչվում ենք պառլամենտական կառավարման ձևի հետ կապված, ի ցույց է դնում, որ մեր տարածաշրջանում, միություններում, որոնց մենք անդամակցում ենք` ՀԱՊԿ–ը, ԵԱՏՄ–ն, որը հիմնականում «նախագահների ակումբ» է, շատ ավելի հարմար ու շատ ավելի արդյունավետ կարող է լինել կիսանախագահական տարբերակը»,– ասաց Սիմոնյանը։
Նա նաև շեշտեց, որ երբ 2015թ–ի Սահմանադրական փոփոխություններով ՀՀ երրորդ նախագահ Սերժ Սարգսյանի առաջարկով Հայաստանն անցնում էր խորհրդարանական կառավարման կարգի, արդեն իսկ ակնհայտ էր, որ այն բազմաթիվ խնդիրների կարող է հանգեցնել։
Խոսելով Փաշինյանի առաջարկի մասին` Սիմոնյանը նշեց, որ դրանով փորձ է արվելու լուծել առաջացած խնդիրները։
«Օրինակ`վարչապետը հանրապետության նախագահին ինչ–որ պաշտոնյայի (ով ուզում է լինի, վերանանք անձերից) պաշտոնից ազատելու առաջարկ է ներկայացնում, ու փաստացի առաջանում է խնդիր, ինչ–որ վակուում է առաջնում»,– ասաց նա։
Լրագրողների ճշտմանը, թե արդյո՞ք սա չի նշանակում, որ Սահմանադրությունը փոխվում է ԳՇ պետի շուրջ առաջացած խնդիրը լուծելու համար, Սիմոնյանը պատասխանեց, որ Օնիկ Գասպարյանի հարցը պետք է լուծվի ավելի շուտ ու չի կարող մինչև հոկտեմբեր մնալ առկախված։
Ամեն դեպքում Սահմանադրության վերաբերյալ ասվածն առայժմ միայն առաջարկ է, ըստ Սիմոնյանի` դիսկուրս, որը բացվել է, և առաջիկայում պարզ կլինի, թե քաղաքական ուժերը, հանրությունը դրան ինչպես կարձագանքեն։
Հիշեցնենք` Փաշինյանը երեկ Հանրապետության հրապարակում կազմակերպած հանրահավաքի ժամանակ հայտարարեց, որ 2021թ–ի հոկտեմբերին Հայաստանում կանցկացվի սահմանադրական հանրաքվե, որով Հայաստանը կանցնի կիսանախագահական կառավարման համակարգի։
Սահմանադրության 2015 թվականի փոփոխությունների արդյունքում սահմանված կարգով 2018 թվականի ապրիլի 9-ից՝ ՀՀ նախագահ Արմեն Սարգսյանի պաշտոնը ստանձնելու օրվանից, Հայաստանի Հանրապետությունը կիսանախագահական կառավարման ձևից անցել է խորհրդարանական կառավարման ձևի:
«Ես շատ եմ մտածել, թե որտեղ ենք մենք սխալվել». Նիկոլ Փաշինյանը ներողություն խնդրեց
