ԵՐԵՎԱՆ, 12 մարտի - Sputnik. ԵԽԽՎ միգրացիայի և փախստականների նիստի ժամանակ ադրբեջանական պատվիրակության ղեկավար Սամեդ Սեիդովը Նաիրա Զոհրաբյանին մեղադրել է «պատերազմի հրձիգ» լինելու մեջ։ Եվրոպայի խորհրդի խորհրդարանական վեհաժողովի հայաստանյան պատվիրակության անդամ Նաիրա Զոհրաբյանը Facebook-ի իր էջում կատարվածի մասին գրառում է արել՝ ներկայացնելով Սեիդովի հնչեցրած մեղադրանքները։
Մարալից բացի, Ադրբեջանում ենթադրաբար ևս 3 հայ կին գերի կա. Զոհրաբյան
Ադրբեջանի պատվիրակության ղեկավարը հունից դուրս է եկել, երբ Զոհրաբյանը խոսել է ադրբեջանցի զինվորների վայրագություններից ու փաստերով ներկայացրել, թե ինչպես են ողջ-ողջ գլխատում մեր զինվորներին ու քաղաքացիական անձանց։ Զոհրաբյանը կոչ է արել Սեիդովին, «ով խաղաղասիրության և երկխոսության ճառեր էր անում», խաղաղասիրաբար զրուցել իր Ալիևի հետ ու ազատել հայ ռազմագերիներին։
«Ադրբեջանական պատվիրակության ղեկավարը, իրեն բնորոշ թատերական պաթոսով սկսեց բղավել, որ ես պատերազմի հրձիգ եմ, որ տարիներ շարունակ ես ԵԽԽՎ ամբիոնն օգտագործել եմ ամենաժողովրդավար Ադրբեջանին և ամենամարդասեր ադրբեջանցիներին մարդասպան ու բարբարոս ներկայացնելու համար և կոչ արեց ԵԽԽՎ-ին ինձ չեզոքացնել, եթե ուզում են ունենալ կոնստրուկտիվ երկխոսություն հայկական և ադրբեջանական պատվիրակությունների միջև»,- գրել է Զոհրաբյանը։
ԱԺ պատգամավորի խոսքով՝ տեսարանը խիստ զվարճալի էր, քանի որ ինքն ամեն օր ԵԽԽՎ պատգամավորներին ուղարկում է «ամենաժողովրդավար ու ամենամարդասեր» Ադրբեջանի զինվորների կատարած վայրագությունները հայ զինվորների և քաղաքացիական անձանց հանդեպ։
Զոհրաբյանը նաև ընդգծում է, որ բացի իրեն ուղղված մեղադրանքներից, Ադրբեջանի պատվիրակության ղեկավարը Մարալ Նաջարյանին ներկայացրել է որպես Շուշիում դիպուկահար, որին Ադրբեջանն ազատ է արձակել որպես բարի կամքի դրսևորում։
«Պնդել եմ, որ Մարալը պատանդ է». Սինանյանը Մոսկվայում քննարկել է նաև հայ գերիների խնդիրը
