ԵՐԵՎԱՆ, 12 մայիսի - Sputnik. ՀՀ նախագահի նստավայրում մեկնարկեց ՀՀ վարչապետի պաշտոնակատար Նիկոլ Փաշինյանի և Վրաստանի կառավարության ղեկավար Իրակլի Ղարիբաշվիլիի հանդիպումը։
Սկզբում Բաղրամյան 26 ժամանեց Փաշինյանը, իսկ հետո՝ նրա վրացի գործընկերը։
Ինչպես հայտնեց Հայաստանում Վրաստանի դեսպան Գեորգի Սագանելիձեն, երկու երկրների վարչապետները կքննարկեն երկկողմ հարաբերությունների ողջ սպեկտրը։
Հիշեցնենք` Ղարիբաշվիլին պաշտոնական այցով Հայաստան է ժամանել այսօր։
Հայաստանյան այցի շրջանակում հանդիպումներ են նախատեսված ոչ միայն ՀՀ վարչապետի պաշտոնակատար Նիկոլ Փաշինյանի, այլև ՀՀ արտաքին գործերի նախարարի պաշտոնակատար Արա Այվազյանի հետ:
Ծիծեռնակաբերդի հուշահամալիրում Վրաստանի վարչապետը հարգանքի տուրք կմատուցի Հայոց ցեղասպանության զոհերի հիշատակին:
Վարչապետի պաշտոնակատար Նիկոլ Փաշինյանի անունից ի պատիվ Վրաստանի վարչապետ Իրակլի Ղարիբաշվիլիի կտրվի պաշտոնական ընթրիք:
Ղարիբաշվիլին նախկինում Հայաստան է այցելել ինչպես Վրաստանի վարչապետի կարգավիճակով` 2014-ին և 2019-ին, այնպես էլ 2020–ին` որպես պաշտպանության նախարար:
