ԵՐԵՎԱՆ, 9 հունիսի – Sputnik. ՀՀ երրորդ նախագահ Սերժ Սարգսյանն այսօր Գեղարքունիքի մարզում ՀՀ վարչապետի պաշտոնակատար Նիկոլ Փաշինյանի վերաբերյալ ձայնագրություն է հրապարակել։ Տեղեկությունը հայտնում է ՀՀԿ փոխնախագահ Արմեն Աշոտյանը։
«Հասարակությունը սպասում է այսօր խոստացած բացահայտումներին: Անցավ Սերժ Սարգսյանի տված 24 ժամը, և կապիտուլյանտը Հայաստանի երրորդ նախագահին ուղղված մեղադրանքների մասով՝ կոռուպցիա, կազինո, թալան, գեթ մեկ, կրկնում եմ՝ գեթ մեկ ապացույց չհրապարակեց: Այս մեղադրանքների թեման ամբողջությամբ համարենք փակված: Ինչ վերաբերում է Սարգսյանի խոստմանը, քիչ առաջ Գեղարքունիքի մարզում հանդիպման ժամանակ նա հրապարակեց մի ձայնագրություն, որից պարզ է դառնում, որ Նիկոլը դիտավորյալ տապալել է բանակցային պրոցեսը: Նիկոլը այդ քայլով պատերազմ է բերել հայ ժողովրդի գլխին: Կապիտուլյանտը Ռուսաստանին շարունակում է մեղադրել ապրիլյան պատերազմի մեջ: Նիկոլը ազգային կարևորության հարցերով իրեն գժի տեղ է դրել արտերկրում, և իր գժության գինը վճարեց 5 հազար հայ նահատակ»,– Facebook–ի իր էջում գրել է Աշոտյանը։
Նա նշել է, որ սա նաև միջազգային սկանդալ է:
«Սակայն ինձ համար միջազգային սկանդալը երկրորդական է: Առաջնային է այն փաստը, որ հրապարակված ձայնագրությունը ապացուցում է, որ Նիկոլը Հայաստանի ազգային անվտանգության թիվ մեկ սպառնալիքն է»,– եզրափակել է ՀՀԿ փոխնախագահը` խոստանալով, որ շուտով տեսանյութ կհրապարակվի։
Հիշեցնենք` երեկ ՀՀ երրորդ նախագահ Սերժ Սարգսյանն անդրադարձել էր Փաշինյանի այն հայտարարությանը, թե Մոնտե Կառլոյի խաղատանը Սարգսյանը զինվորների գումարներն է մսխել։ Սարգսյանն ասել էր` եթե 24 ժամվա ընթացքում Փաշինյանը մեկ փաստ չհրապարակի, ապա ինքը նրա ընտանիքի մասին փաստեր կհրապարակի։
«Սաղ տեղերը լցվել են, որ Փաշինյանը մտնի ճաշելու». Գյումրիում ուժեղացրել են հսկողությունը
