Պապիկյանը նշեց, որ թեև մետաղորսիչ սարքի ձայնային ազդանշանը միացել է իր պայուսակին մոտեցնելիս, բայց այնտեղ որևէ արգելված իր չի եղել։
Իսկ մեր հարցին, թե արդյոք դատարանների նախագահների խորհրդի հրապարակած արգելված իրերի ցանկից որևէ մեկը չի՞ եղել իր պայուսակում, Պապիկյանը պատասխանեց. «Ես նավի թիով կամ բիլիարդի կիով դատարան չեմ եկել։ Չեմ բերել սողուններ, թռչուններ, որևէ արգելված իր չկա իմ պայուսակում»։
Հիշեցնենք, ի պատասխան փաստաբանների այն դժգոհությանը, թե իրենց չի ասվում, թե դատարան մուտք գործելիս դատական կարգադրիչներն ինչ են փնտրում իրենց պայուսակներում, դատարանների նախագահների խորհուրդը կազմել էր արգելված իրերի ցանկ, որտեղ հրազենից, թմրանյութերից ու պայթուցիկներից զատ տեղ էին գտել նաև կացինը, նետը, թուրը, նիզակը, գործելու շյուղերը, նավակի թիերը, բիլիարդի կիերը, ձկնորսության կարթերը, կենդանիները, ձկները, սողունները, միջատները և թռչունները։
