Թե՛ ժնևյան, թե՛ վերջին շրջանի հանդիպումները ոչ մի կարևոր հարց չեն լուծում, կարծում է քաղաքագետը։
«Որովհետև կարևոր հարցերի շուրջ, կարծես թե, ընդհանուր հայտարար չկա։ Եվ դա փաստում են ոչ միայն հայկական և ադրբեջանական կողմերը, այլև միջնորդները»,-ասում է Բոզոյանը։
ԼՂ կարգավիճակի, շփման գծից զինուժի դուրս բերման կամ որևէ այլ առարկայան հարցի շուրջ քննարկումներ այս փուլում տեղի չեն ունենում։ Իսկ քանի որ այս հարցերը քննարկման շրջանակից դուրս են մնում, Բոզոյանի կարծիքով, միջնորդների մոտ մտավախություն կա, որ եթե բանակցությունները դադարեն, պատերազմի վտանգը կմեծանա, այնպես ինչպես դա տեղի ունեցավ անցած տարվա ապրիլին։
«Սա է պատճառը, որ միջնորդները պնդում են, որ բանակցություններն ամեն դեպքում շարունակվեն։ Կարող ենք ասել, որ դրանք բանակցություններ են հանուն բանակցությունների»,- ասում է քաղաքագետը։
Այս պահի դրությամբ ստատուս քվոն պահպանվում է, և որևէ փոփոխություն չկա։