ԱՄՆ նախագահ Թրամփը, թեև դեռ վերջնական որոշում չի կայացրել միջուկային համաձայնագրից դուրս գալու վերաբերյալ, բայց այդ թեմայով սպառնալիքներ շարունակում են հնչել ԱՄՆ-ից։
Միջազգայնագետ Սուրեն Սարգսյանը Sputnik Արմենիայի եթերում կարծիք է հայտնել, որ երեք ամսից ԱՄՆ նախագահն, այնուամենայնիվ, կհայտարարի համաձայնագրից դուրս գալու մասին։
«Դա շատ վտանգավոր քայլ կլինի, որովհետև համաձայնագիրը ձեռք է բերվել բավականին ծանր աշխատանքի և բանակցությունների արդյունքում։ Մեծ հաշվով կողմերը միայն ԱՄՆ-ն ու Իրանը չեն, այլև ԵՄ-ի մի շարք երկրներ, այդ թվում`ԱՄՆ-ի դաշնակիցները և ՌԴ-ը»,-ասաց Սարգսյանը։
Սպիտակ տունն Իրանի դեմ պատժամիջոցների վերականգնումը հետաձգել էր 120 օրով, սակայն միաժամանակ հայտարարել, որ այդ ժամկետում ատոմային գործարքում պետք է լուրջ փոփոխություններ արվեն: Թրամփը եվրոպացի գործընկերներին կոչ էր արել կա՛մ համաձայնել այն սկզբունքներին, որոնք ինքն է առաջարկում, կա՛մ ԱՄՆ-ն դուրս կգա այդ համաձայնագրից։
