Իրանական կողմը բավականին ճկուն առևտրատնտեսական հարաբերություններ է վարում ԵՄ երկրների հետ, և դա սկսվեց միջուկային հարցի համաձայնությունից հետո։ 2017 թվականի ընթացքում Իրան-ԵՄ առևտրաշրջանառությունն աճել է 30 տոկոսով, ինչը նշանակում է, որ Թեհրանը շատ խելացի է վարում այդ հարաբերությունները։
«Հավանաբար այս էր պատճառը, որ ԵՄ-ն չմիացավ Ամերիկային երկու հակաիրանական բանաձևերի քննարկման ժամանակ։ Վստահորեն հաշվի են առնվել պետական շահերը, քանի որ իրանական հարուստ ու խոշոր շուկան դեպի արևելք ծավալվելու առումով լուրջ հնարավորություն է»,- նշեց Վարդանյանը։
Հայաստան-Իրան առումով փորձագետն առանձնացրեց երկու երկրի քաղաքական բարձր մակարդակի հարաբերությունները, սակայն ափսոսանքով նշեց, որ դեռևս չի օգտագործվում տնտեսական հզոր ներուժը։
«ՀՀ-ն և Իրանը առևտրաշրջանառությունն ընդլայնելու մեծ պոտենցիալ ունեն առնվազն երեք կետով` Մեղրու ԱՏԳ շահագործումը, ԵՄ-ի հետ համապարփակ համաձայնագրի ստորագրումը և ԵԱՏՄ շուկան»,- մատնանշեց Վարդանյանը։
