Սա ուղղակի մեղադրանք է Ռուսաստանի հասցեին։ Sputnik Արմենիայի հետ զրույցում, մեկնաբանելով Մեծ Բրիտանիայում նախկին գնդապետ, հետախույզ Սերգեյ Սկրիպալի թունավորման գործի վերաբերյալ ՌԴ-ի նկատմամբ մի քանի երկրների ընդունած հայտարարությունը, ասաց քաղաքագետ Սուրեն Սարգսյանը։
«Մեծ Բրիտանիան, Ֆրանսիան, Գերմանիան ու ԱՄՆ-ն հայտարարեցին, որ Ռուսաստանը բավարար ապացույցներ չի ներկայացրել այն մասին, որ ինքը կանգնած չէ այս հարձակման հետևում։ Եվ սա, ըստ էության, արդեն լուրջ մեղադրանք է ՌԴ-ի հասցեին»,- ասաց Սարգսյանը։
Ռուս- բրիտանական հարաբերությունները երբևէ ջերմ չեն եղել, հիշեցրեց քաղաքագետը` հավելելով, որ նախկինում էլ երկու երկրների միջև սկանդալներ եղել են, որոնք անցել-գնացել են։
Հիշեցնենք, որ Մեծ Բրիտանիայի համար լրտեսության համար մեղադրված Սկրիպալն ու նրա դուստրը մարտի 4-ին անգիտակից վիճակում հայտնաբերվել էին Սոլսբերիի կենտրոնում: Բուժզննման արդյունքում պարզվել էր, որ նրանց թունավորել են ռուսական արտադրության նյարդապարալիտիկ գազով:
