Սմբատ Լպուտյանը նշում է, որ Տիգրան Պետրոսյանի օրոք շախմատը մեծ զարգացում ունեցավ Հայաստանում։
«Տիգրան Պետրոսյանի հաղթանակը մեր հասարակության մեջ փոխեց շախմատի հանդեպ մտածելակերպը»,–հիշում է նա։
Գրոսմայստերի խոսքով` Տիգրան Պետրոսյանի հաղթանակներին հաջորդեց հայկական շախմատի վերածնունդը։
«Տիգրան Պետրոսյանի հետ շփվելու, շախմատ խաղալու շատ եմ առիթներ ունեցել։ Լսել եմ նրա խորհուրդները, որոնք շատ կարևոր են եղել ինձ և մեր մյուս խաղընկերների համար»,–ասում է Լպուտյանը։
Ինչ վերաբերում է հայկական շախմատի ներկային, ապա շախմատիստի խոսքով, այսօր մենք լավ վիճակում ենք, քանի որ հիմքերն ամուր են։
Հիշեցնենք` հունիսի 17-ին շախմատի աշխարհի կրկնակի չեմպիոն Տիգրան Պետրոսյանի 90– ամյակն էր։ 1963 թվականին, հաղթելով Միխայիլ Բոտվիննիկին, Պետրոսյանն առաջին անգամ նվաճեց աշխարհի չեմպիոնի կոչումը, որը պահպանեց 1966 թվականին` հաղթելով Բորիս Սպասկիին։
