Սահմանադրական դատարանի նախագահ Հրայր Թովմասյանի մասին դիմումը չընդունելով` ՍԴ–ն արհամարհանք դրսևորեց։ Sputnik Արմենիայի հետ զրույցում այս մասին ասաց սահմանադրագետ Վարդան Այվազյանը։
Նա նշեց, որ ՍԴ նախագահին պաշտոնանկ անելն ունի ընթացակարգ: Եթե մեղադրանքը կապված է ծառայողական լիազորությունների կատարման հետ, ապա օրենքով անձեռնմխելիությունից զրկելու թույլտվությունը պետք է տա ՍԴ-ն, բայց եթե մեղադրանքը կապված չէ լիազորությունների կատարման հետ, ապա նա չի օգտվի անձեռնմխելիությունից, և նման դեպքում մեղադրական դատավճիռ լինելուց հետո անգամ քրեական գործի ընթացքում էլ շարքային քաղաքացու նման նրան կարող են պաշտոնանկ անել կամ քրեական գործի քննության ընթացքում կասեցնել լիազորությունները, մինչև գործը գնա դատարան:
«ՍԴ նախագահի դեմ հարուցված գործը անգրագետ, չհիմնավորված գործընթաց է: ՍԴ-ն Հրայր Թովմասյանի դիմումը վարույթ չընդունելով և՛ բարոյական, և՛ մնացած առումներով փոշիացրեց ԱԺ մեծամասնությանը: Այնքան արհամարհանք դրսևորեց, որ նույնիսկ վարույթ չընդունեց: 94 էջանոց հիմնավորման առիթով, որով դիմեցին Հրայր Թովմասյանին պաշտոնանկ անելու համար, ազատ թեմայով գրվեցին շարադրություններ սոցիալ-կենցաղային անլուրջ հիմքերով, իսկ իրավական մասով ՍԴ-ին իր իրավասության շրջանակներում այդ անհիմն սոցիալ-կենցաղային հիմքի վրա գրված որոշումը չընդունեց»,- ասում է Վարդան Այվազյանը:
ՀՀ ԱԱԾ-ն Հրայր Թովմասյանի հոր և դուստրերի հարցաքննության որոշ մանրամասներ է ներկայացրել
Սահմանադրագետի կարծիքով՝ ԱԺ-ն ավելի խելացի քայլ կաներ և Հրայր Թովմասյանին փակուղի կմտցներ, եթե որոշում կայացնելու փոխարեն հրապարակային հարցում ուղղեր ՍԴ նախագահին, թե ինչու սահմանադրության անցումային դրույթների գլուխը ուժի մեջ մտնելուց 20 օր առաջ, արդեն նախապես մտածված կերպով կազմակերպեց, որ ՍԴ գործող նախագահը հրաժարական տա և ինքը զբաղեցնի նրա տեղը հին կարգավորումներով:
Հիշեցնենք, որ հոկտեմբերի 3-ին ԱԺ–ն ընդունել էր «Իմ քայլը» խմբակցության նախագիծը` Սահմանադրական դատարանի անդամ Հրայր Թովմասյանի լիազորությունները դադարեցնելու հարցով ՍԴ դիմում ներկայացնելու մասին։
Դիմումում Թովմասյանի պաշտոնանկության համար 4 հիմք էր ներկայացված։
Նշվում էր, որ նա իրավունք չուներ մասնակցելու Ռոբերտ Քոչարյանի գործով ՍԴ վարույթին, քանի որ փոխկապակցված է ՀՀԿ–ի, ՀՀԿ նախագահ Սերժ Սարգսյանի ու Քոչարյանի հետ։
Հրայր Թովմասյանը նաև Քոչարյանի պաշտպան Արամ Օրբելյանի կնքահայրն է։ Նա նախկինում մարտի 1–ի գործով դատավարությունների վերաբերյալ հրապարակային կարծիք է հայտնել, մասնակցել քրգործի վարույթին, ինչը կողմնակալ վերաբերմունքի հիմք է տալիս։ Իսկ չորրորդ պատճառն այն է, որ Թովմասյանը բոլոր հանգամանքներն անտեսել է ու չի հայտնել նիստին իր մասնակցության անհնարինության մասին։
Հոկտեմբերի 14-ին ՍԴ-ն մերժեց «Ազգային ժողովի դիմումի հիման վրա՝ Սահմանադրական դատարանի դատավոր Հրայր Թովմասյանի լիազորությունները դադարեցնելու վերաբերյալ» գործի քննությունը, իսկ այսօր արդեն ներկայացրեց դիմումը մերժելու հիմքերը։
«Պատրաստ եմ ստանձնել Հրայր Թովմասյանի դուստրերի շահերի պաշտպանությունը». Զոհրաբյան
