Նախագծի համաձայն՝ օրենքի համապատասխան դրույթների շրջանակներում շրջակա միջավայրին վերաբերող տեղեկատվությունը տնօրինող սուբյեկտին հնարավորություն կընձեռվի պաշտպանել հանրային շահն ու անվտանգությունը՝ ոլորտին վերաբերող խնդիրների կարգավորման հարցում։
Աշոտ Մելիքյանի կարծիքով՝ մտահոգությունն այն է, որ հազվագյուտ կենդանիների ու բույսերի տարածքը գաղտնի պահելու միտումը չի նպաստելու որսագողության խնդրի լուծմանը, և որևէ հիմք չկա այդ տեղեկատվությունը պահել հասարակությունից:
«Նախարարությունն ուղղակի պետք է պատշաճ գործողություններ իրականացնի, որպեսզի այդ տարածքները շատ լավ պահպանվեն և որևէ որսագող չկարողանա այնտեղ ներխուժել ու որս անել: Թեև նախարարությունն ասում է, որ նպատակը որսագողության դեմ պայքարն է, բայց դա չեն անում տեղեկատվության ազատության անհիմն սահմանափակումներով»,- համոզված է Խոսքի ազատության պաշտպանության կոմիտեի նախագահը:
Աշոտ Մելիքյանն ակնկալում է, որ նախարարությունը կկազմակերպի քննարկումներ և հարցն ավելի խորը կուսումնասիրի, իսկ իրենք իրենց խոսքը կհասցնեն տեղ, որպեսզի նախագիծը հանվի շրջանառությունից:
«Յուրաքանչյուր նախարարություն իր պատկերացումներն ունի, թե ինչ տեղեկություններ կուզենար սահմանափակել և համապատասխան օրենսդրական փոփոխություններ անել, սակայն «Տեղեկատվության ազատության մասին» օրենքը նրա համար է, որ ՀՀ յուրաքանչյուր քաղաքացի կարողանա ձեռք բերել այն տվյալները, որոնք հետաքրքրում են իրեն և չեն պարունակում պետական կամ այլ գաղտնիք»,- համոզված է Խոսքի ազատության պաշտպանության կոմիտեի նախագահը:
Պիտանի է մինչև․․․ ինչպես են Հայաստանում կեղծ և ժամկետանց ապրանքներ հայտնվում
Աշոտ Մելիքյանի փոխանցմամբ՝ պետական մարմինները հաճախ ուզում են ընդլայնել գաղտնիք պարունակող տեղեկությունների ցանկը, սակայն երբեմն այդ ցանկությունները կառուցողական չեն և նույնիսկ հակասում են առողջ բանականությանը, ինչպես այս պարագայում:
