Քաղտեխնոլոգ Վիգեն Հակոբյանը Sputnik Արմենիայի եթերում մեկնաբանելով Լևոն Տեր-Պետրոսյանի հարցազրույցը՝ նշեց, որ իր համար անհասկանալի է ՀՀ առաջին նախագահի՝ ներքաղաքական իրավիճակը լիցքաթափելու կոչը, քանի որ իշխանափոխությունից հետո ընկած ժամանակաշրջանում կորոնավիրոսով պայմանավորված վերջին ամիսն, ըստ նրա, ամենահանգիստն է։
«Չեմ կարծում, որ համավարակի այս բարդ շրջանը եղել է ներքաղաքական ամենասուր ժամանակահատվածը և համամիտ չեմ այն տեսակետին, որ հիմնականում դրանով է պայմանավորված Տեր–Պետրոսյանի կոչը։ Բայց դա չի նշանակում, որ ներքաղաքական զարգացումներ և սուր քննադատություններ չկան։ Այդուհանդերձ մեզանում ավելի բարդ շրջաններ էլ են եղել»,– ասաց նա։
Հակոբյանի փոխանցմամբ` առաջին նախագահի կոչը գուցե պայմանավորված է այն հանգամանքով, որ նա գիտակցում է, որ համավարակի ֆորմալ շրջանը կանցնի, մարդիկ դուրս կգան տներից, կհայտնվեն արդեն սոցիալ–տնտեսական դժվարությունների առջև, ու այդ ժամանակ կլինեն որոշակի ներքաղաքական սրացումներ ու բախումներ։ Անկախ նրանից` երկրում կլինի ուժեղ ընդդիմություն, թե ոչ, առկա իրավիճակն է դրդում ներկա իշխանությունների հանդեպ լինել ընդդիմադիր, որովհետև հրամայական է դարձել սոցիալ–տնտեսական բազմաթիվ խնդիրների լուծումը։
ՀԱԿ-ն առաջարկում է վերականգնել կիսանախագահական մոդելը
«Շատերի մոտ առաջանում է այն հարցը, թե ինչու՞ Տեր–Պետրոսյանը հենց հիմա հանդես եկավ նման ուղերձով։ Նա նախընտրում է հանդես գալ իր սիրելի ոճի մեջ։ Պայմանականորեն ասած` Տեր–Պետրոսյանն իր ուղերձով ցանկացել է ստանձնել «ժողովրդի հոր» դերակատարությունը` իրեն վերապահելով վերևից կարգավորողի, «խաղաղության աղավնու» կոնսոլիդացնող դերը։ Սա առաջին նպատակն է, որովհետև առաջին նախագահը ձգտում է վերադառնալ ավանդական դերին»,– ընդգծեց քաղտեխնոլոգը։
Նրա կարծիքով` ուղերձում երկրորդ և երրորդ նախագահներին առնչվող կետերը պետք է դիտարկել ընդհանուր համապատկերի մեջ, որովհետև ինը կետերն ըստ էության փոխկապակցված են, և Տեր–Պետրոսյանն իր իրավահաջորդների համար քաղաքական սակարկությունների տեղ է թողնում։
Այսպես` ապրիլյան պատերազմի հանգամանքները քննող հանձնաժողովի աշխատանքը սառեցնելու դիմաց Սերժ Սարգսյանին առաջարկվում է իրեն հավատարիմ լրատվամիջոցների վրա ներազդել, որպեսզի գործող իշխանությունների նկատմամբ չտարածեն ատելության ու թշնամանքի քարոզ։ Նույն առաջարկն արվում է նաև Ռոբերտ Քոչարյանին, ինչն, ըստ քաղտեխնոլոգի, նույնպես քաղաքական սակարկության առաջարկություն է, թեև Քոչարյանի պարագայում դա, ըստ նրա, այնքան էլ պրագմատիկ չէ, որովհետև վերջինս դեռ գտնվում է բանտում։
Քաղտեխնոլոգի գնահատմամբ` Լևոն Տեր–Պետրոսյանը լուծում է երկու կարևոր խնդիր, նախ իմիջային` հանդես գալով ալտրուիստական առաջարկներով, և երկրորդ` նա ինը կետով փորձում է նոր քաղաքական գործընթացի սկիզբ գեներացնել։
Հիշեցնենք՝ երեկ ՀՀ առաջին նախագահ Լևոն Տեր-Պետրոսյանը ILur.am-ին տված հարցազրույցում անդրադառնալով Հայաստանում կորոնավիրուսով պայմանավորված իրավիճակին առաջարկել էր ներքաղաքական իրավիճակի լիցքաթափման իր տեսլականը, որը կազմված է 9 կետերից։
