Սննդաբան Գայանե Շահխաթունու դիտարկմամբ` կյանքի ռիթմի ցանկացած փոփոխություն ստեղծում է սթրեսային իրավիճակ։ Գիտականորեն ապացուցված է, որ մարդիկ նման իրավիճակում գիրանում են, քանզի սթրեսի պատճառով արտադրվում է կարտիզոլ հորմոն, որի պատճառով մարմինը սկսում է քաշ հավաքել։ Թվում է, թե օրգանիզմում ճգնաժամ է, ուստի առաջանում է հավելյալ սնունդ ընդունելու անհրաժեշտություն, ինչն ըստ էության պատասխան ռեակցիա է։
«Քանի որ մարդիկ դարեր ի վեր սնունդը վերածել են հաճույքի, ապա դա խեղաթյուրել է նրանց կենսակերպը։ Սնունդը տվյալ դեպքում ոչ թե կշտացնելու բնական ակտ է, այլ դարձել է հաճույք ապահովելու միջոց, ինչը նույնպես նպաստում է գիրանալուն։ Քանի որ շատերն այժմ չեն աշխատում, պարապ են, հետևաբար սկսել են շատ ուտել, և դա ռիթմի, օրակարգի խախտում է»,– Sputnik Արմենիայի հետ զրույցում ասաց սննդաբանը։
Շահխաթունու համոզմամբ` սնվելն ու սննդի հանդեպ ունեցած ցանկությունը զուտ հոգեբանական երևույթ է։ Ցանկացած մարդ ինքն է որոշում, թե ինչ պետք է գիտակցաբար ընդունի, ինչն է լավ կամ ճիշտ իր համար, և ինչպես կարող է իր մարմինը հետ վարժեցնել որոշ սննդակարգերից։ Սննդաբանն այս պահին խորհուրդ է տալիս պարզապես որոշակի սխեմա գծել, ըստ որի` կարելի է զարթուցիչով ժամակարգ ֆիքսել և սնվել 2-3 ժամը մեկ։
«Ամենակարևոր նախապայմանը երեկոյան ժամը վեցից կամ յոթից հետո սնունդ ընդունելու իսպառ վերացումն է։ Կարելի է օգտվել բացառապես սպիտակուցային սննդից, որովհետև միայն սպիտակուցները չեն նպաստում ճարպակալման գործընթացին։ Բայցևայնպես, դրանք էլ պետք է ընդունել քիչ քանակով»,– նշեց սննդաբանը։
Ինչպես չգիրանալ, երբ տանն ես. պայքարին միացել են սննդաբաններն ու մարզիչները
Շահխաթունին հատկապես քաղցրակերներին հորդորում է քաղցրեղենի չափաբաժինը հասցնել նվազագույնի և ընդունել միայն օրվա առաջին կեսին։ Ընդ որում` քաղցրավենիքները պետք է լինեն բնական տեսակի։ Սննդաբանը վստահ է, որ առողջ սննդակարգն առհասարակ թանկ հաճույք չէ, հետևաբար պետք է հետևել սնվելու բնականոն ռիթմին։
