«Հարկ վճարողների պաշտպանություն» ՀԿ ղեկավար Փայլակ Թադևոսյանի դիտարկմամբ` պետության օժանդակության ձևերը կարող էին տարբեր լինել։ Ըստ նրա` օրինակ՝ կարող էր քննարկվել որոշ հարկատեսակների կամ շահութահարկի կանխավճարների չափերի վերանայման հարցը։ Պետությունն իր օժանդակության ծրագրերն իրականացնում է ֆինանսավորման միջոցով, և այստեղ կարևոր է թիրախների ճիշտ ընտրությունը։
«Այստեղ կարծեք թե խնդիր ունենք կապված կառավարության կողմից իրականացվող միջոցառումների թիրախավորման հետ, քանզի տարբեր պատճառներով, այդ մասին նշեց նաև վարչապետը, որ միջոցառումներից օգտվել են մարդիկ կամ կազմակերպություններ, որոնք ըստ էության չեն տուժել, այսինքն` դասակարգման և ճիշտ գույքագրման դեպքում առկա են եղել որոշակի խնդիրներ։ Ոչ նպատակային հատկացումների խնդիրը առաջացել է ոչ ճիշտ պատկերն ունենալու արդյունքում»,– Sputnik Արմենիայի հետ զրույցում ասաց նա։
Թադևոսյանի կարծիքով` հարկային ոլորտում օրենսդրական փափոխությունների միջոցով տույժերի տոկոսադրույքների չափերի նվազեցումը միանշանակ դրական քայլ էր, քանի որ, երբ առկա է նման ճգնաժամային իրավիճակ, պետությունը պետք է մտածի ու վերանայի հարկային քաղաքականությունը և դա իրականացնի ամբողջականորեն։
Պետությունը հարկ վճարողներին նոր գործիք է առաջարկում. ի՞նչ կտա օրենքի փոփոխությունը
«Առկա իրավիճակը ցույց տվեց, որ դեռևս նախորդ իշխանությունների ժամանակ ընդունված Հարկային օրենսգիրքը պետք է ամբողջությամբ վերանայվի, պետք է դրվեն սկզբունքներ, որոնց շրջանակում անհրաժեշտ է լուծել այն խնդիրները, որոնք պետությունն իր առջև դնում է առաջիկա տարիների կտրվածքով։ Գործող Հարկային օրենսգրքում կան նորմեր, ուղենիշներ, որոնք օրենսգրքի բովանդակության հետ կապ չունեն։ Դրանք և՛ անտեղի կարգավորումներն են, և՛ անհամաչափ պատասխանատվության միջոցներն են, և՛ բիզնեսին խոչընդոտող դրույթները»,– նշեց ՀԿ ղեկավարը։
Նրա խոսքով` հեղափոխությունից հետո առկա տնտեսական իրավիճակի պայմաններում անհրաժեշտ են ընդհանրական մոտեցումներ պարունակող փոփոխություններ։ Թադևոսյանն, օրինակ, մատնանշում է ընդհանուր հայտարարգրման ինստիտուտի ներդրումը, բայց դրան պետք է նախորդեն գործողություններ, սկզբունքների մանրակրկիտ քննարկումներ։ Ըստ այդմ` պետք է խրախուսման մեխանիզմները լինեն հնարավորինս շատ, այսինքն` հայտարարագրումը պետք է զուգորդվի խրախուսող նորմերի կիրառմամբ, համակարգը պետք է լինի ոչ թե պարտադիր, այլ անհրաժեշտ է առաջ շարժվել աստիճանական քայլերով, տեսնել արդյունքներն ու հետո միայն այն ընդհանրական դարձնել բոլորի համար։
Կորոնավիրուսի պատճառով հարկերը չվճարած գործարարների տույժ-տուգանքները կնվազեցվեն
