ԲՀԿ–ն հայտնել էր, որ դիմելու է ՍԴ` սահմանադրական բարեփոխումների նախագծի սահմանադրականությունը վիճարկելու։ Նրանք կոչով դիմել էին ԼՀԿ իրենց գործընկերներին` միանալ իրենց, որպեսզի պատգամավորների` անհրաժեշտ թվով ստորագրություն ունենան։ «Լուսավոր Հայաստանն» իր հերթին հայտարարեց, որ ԱԺ–ի ընդունած սահմանադրական փոփոխությունների նախագծի առնչությամբ Սահմանադրական դատարան կդիմի, սակայն իրենց դիմումը կունենա այլ հիմքեր։ Նրանք ՍԴ կդիմեն, երբ ավարտվի նաև ՀՀ երկրորդ նախագահ Ռոբերտ Քոչարյանի գործով ՍԴ–ում նախատեսված նիստը։
Վիգեն Հակոբյանի դիտարկմամբ`քաղաքական ուժը կարող է ունենալ երրորդ ճանապարհ, բայց երբ նրա ճակատին դաջված է ընդդիմադիր որակումը, ու հարցն այդքան էլ բարդ չէ, ինչի մասին խոսեցին Էդմոն Մարուքյանն ու նրա կուսակիցները, որ տարրական իրավաբանական պատկերացումներ ունեցող մարդիկ էլ են հասկանում, թե ինչ է կատարվում, առավել ևս, երբ խոսքը վերաբերում է հակասահմանադրական ակտին, ապա այդտեղ առանձնապես ընտրություն էլ չպետք է լիներ։
«Բայց փաստը մնում է փաստ, որ երրորդ կամ չորրորդ ուղիով գնացող, այսպես կոչված, ընդդիմությունն այդ բանը չարեց։ Գուցե տվյալ դեպքում «Լուսավոր Հայաստանը» վերջնականապես համալրեց այն քաղաքական նախագծերի շարքը, որոնք մեր անկախ հանրապետության քաղաքական պատմության տարբեր փուլերում համարվում էին այս կամ այն իշխանական ուժի նախագիծ։ Վարքագիծն այլ քաղաքական գնահատական տալու մանևր էլ չի թողնում»,– նշում է քաղտեխնոլոգը։
Հակոբյանի խոսքով` շատ ավելի դժվար է կատարել այն քայլը, որն արեց ԼՀԿ–ն` մտածելով, որ ավելի լավ է իմիջային ու քաղաքական առումով դժվար վերականգնելի կորուստ ունենալ, քան անել այն, ինչը ջրի մակերեսին էր։ Քաղտեխնոլոգի կարծիքով` ԼՀԿ–ի գնահատականների ու քայլի միջև արձանագրվեց էական տարբերություն։
Հիշեցնենք` Ազգային ժողովը հունիսի 22-ին կայացած արտահերթ նիստում ընդունեց «Իմ քայլը» խմբակցության հեղինակած նախագիծը, որով Սահմանադրական դատարանի գործող նախագահը պաշտոնանկ է արվում ու շարունակում աշխատել որպես ՍԴ անդամ, իսկ ՍԴ երեք անդամները, որոնք այդ պաշտոնում աշխատել են 12 տարուց ավելի, ուղարկվում են թոշակի:
Հետո խորհրդարանը ընդունեց նաև «ԱԺ կանոնակարգ» օրենքում առաջարկվող փոփոխությունը, որով Սահմանադրական փոփոխությունները ՀՀ նախագահի կողմից չպիտի ստորագրվեն: ՀՀ նախագահը պետք է ստորագրեր միայն «ԱԺ կանոնակարգի» փոփոխությունը, որից հետո այն ուժի մեջ կմտնի, և ԱԺ նախագահը կհրապարակի Սահմանադրական փոփոխությունների փաթեթը: Այդ պահից ՍԴ նախագահը պաշտոնանկ կհամարվի, իսկ ՍԴ երեք դատավորների լիազորությունները կդադարեն:
ՀՀ նախագահ Արմեն Սարգսյանը հունիսի 24-ին ստորագրեց «Ազգային ժողովի կանոնակարգ» սահմանադրական օրենքում լրացումներ և փոփոխություն կատարելու մասին, «Սահմանադրական դատարանի մասին» սահմանադրական օրենքում լրացումներ կատարելու մասին օրենքների փաթեթը։
