Դավիթ Բաբայանը ցավով նշեց, որ Ադրբեջանն ունի լավ մշակված, կայացած համակարգ և այն գործի դնող մասնագետներ, այսինքն` Ադրբեջանը, ըստ նրա, այնպիսի երկիր է, որը ցանկացած սադրանք իրականացնելիս հետամուտ է լինում մի քանի նպատակների իրականացման` լոկալ, տարածաշրջանային և աշխարհաքաղաքական։
«Նախ հակառակորդի սադրանքը դիտարկենք Արցախ–Ադրբեջան հարթությունում։ Յուրաքանչյուր նման քայլ նպատակ ունի առաջին հերթին վհատություն և վախ սերմանել արցախցիների շրջանում, որպեսզի մարդիկ սկսեն կասկածել, որ լինելու է նոր պատերազմ, ուստի թերահավատորեն են վերաբերվելու իրենց ապագային, մտածելու են, որ պետք չէ վերադառնալ Արցախ, իսկ եկածներն էլ կմտածեն հեռանալու, Արցախը լքելու մասին։ Այդ ամենով հանդերձ` ադրբեջանցիները նպատակ ունեն կանգնեցնել կամ նվազեցնել արցախցիների վերադարձը պատմական հայրենիք»,– նշեց ԱՀ նախագահի խորհրդականը։
Երկրորդ հարթությունը, ըստ Բաբայանի, այն է, որ նման սադրանքներով Ադրբեջանը ձգտում է Արցախում և ՀՀ–ում սերմանել հակառուսական տրամադրություններ` հարված հասցնելով ռուս խաղաղապահների վարկանիշին, որպեսզի ցույց տա, թե իբր նրանք չեն կարողանում իրենց առաքելությունը իրականացնել։ Բաբայանի համոզմամբ` սա նաև հարված է Ռուսաստանի Դաշնության վարկանիշին, և այստեղ տեսանելի է արդեն ադրբեջանաթուրքական սերտ համագործակցությունը։
Ադրբեջանի սադրանքները շարունակվում են Մեծ Շեն և Հին Շեն բնակավայրերի ուղղությամբ. ԱԳՆ
«Երրորդ նպատակն այն է, որ նման սադրանքներով Ադրբեջանը փորձում է առհասարակ խարխլել հայ–ռուսական եղբայրական հարաբերությունները, որովհետև արդեն ասպարեզ են դուրս գալիս ինչ–որ դեմագոգներ, որոնք սկսում են շահարկել հարցն ու դրանով իսկ իրենց հերթին հարված են հասցնում հայոց պետականությանը, Արցախի անվտանգությանը։ Այդ կեղտոտ շարասյան ներկայացուցիչներն Արցախում երկու–երեքն են, իսկ Հայաստանում՝ ավելի շատ»,– նշեց ԱՀ նախագահի խորհրդականը։
Բաբայանի կարծիքով` ադրբեջանական սադրանքներին պետք է հակադարձել ու դիմակայել տարբեր ձևերով` դիվանագիտական ու ռազմական. եթե անհրաժեշտ է, պետք է զենքով կանգնել մինչև վերջ և սերտ համագործակցություն ապահովել խաղաղապահների հետ։ Ըստ նրա` պետք չէ թուլացնել դիրքերն ու ընկնել սադրիչների հետևից։
