Սարո Սարոյանի դիտարկմամբ` ՀԱԿ–ն իր որոշմամբ ըստ էության խնդիր ունի ինչ–որ պլատֆորմով ներկայանալ և այդ քաղաքական ուժի առաջնորդ, ՀՀ առաջին նախագահ Լևոն Տեր–Պետրոսյանը ցանկանում է տարանջատվել նախկիններից և ներկաներից։ Բայց, ըստ վերլուծաբանի, խնդիրն այն է, որ տարանջատման արանքում հայտնվելու որևէ դիրք չկա, ուստի որոշում կա այդ ամբողջն իբրև մեկ ընդհանրություն դիտարկել։
«Այդ տեսակետից Տեր–Պետրոսյանը բոլորին միավորում է որպես «ոչմիթիզականներ» և առաջ բերում այն գիծը, որ տարիներ առաջ, երբ իրեն չեն հասկացել կամ չեն ընդունել, իր կանխատեսումները հաշվի չեն առել, այդ ամենը եղել է հենց «ոչմիթիզականների» միավորման արդյունքում, ինչն էլ կրախի առջև է կանգնեցրել երկիրը»,– նշեց Սարոյանը։
Նրա կարծիքով` Տեր–Պետրոսյանի կողմից առաջ քաշվող թեզերը հնարավորություն են տալիս տարանջատվել քաղաքական դաշտում գործող մյուս բոլոր միավորներից, ընդ որում` Տեր–Պետրոսյանը «ոչմիթիզականների» անվան տակ միավորում է և՛ «սևերին», և՛ «սպիտակներին»։
«Առաջին նախագահը փորձում է հասարակության ուշադրությունը բևեռել իր գլխավորած ուժի վրա։ Այլ հարց է, թե իր առաջ քաշած թեզերը որքանով են հիմնավոր և տրամաբանված, որքանով են ազնիվ։ Պետք է տարանջատենք երկու բան. մեկը դիրքավորումն է, որով փորձ է արվում ապահովել ՀԱԿ–ի քաղաքական ընթացքն այս ընտրական պրոցեսում, և մյուսը, թե որքանով է նրա տված գաղափարական ուղղվածությունը ճշմարիտ»,– նշեց անկախ վերլուծաբանը։
Սարոյանի գնահատմամբ` ՀԱԿ–ը պայքարելու է նաև այն էլեկտորատի համար, որն արդեն իսկ հիասթափվել է Նիկոլ Փաշինյանից և պատրաստ է տարանջատվել նրանից։ Քանի որ խաղաղասիրական թեզերը, որոնք գալիս էին նաև Տեր–Պետրոսյանի կողմից ու երկրին բերեցին պարտության, ապա այժմ կա խնդիր` ապացուցելու, որ ժամանակին քարոզածը բոլորովին այլ բան էր։ Իսկ թե ինչպիսին էր իրականում այդ քարոզը, մենք, ըստ վերլուծաբանի, ականատես կլինենք առաջիկա ընտրություններում։
ՀԱԿ-ը կոչ է անում ուժերը չջլատել. ինչ ուղերձ է պարունակում Տեր-Պետրոսյանի հայտարարությունը
Հիշեցնենք, որ մայիսի 18-ին Հայ ազգային կոնգրեսի նորընտիր վարչության անդրանիկ նիստում որոշում կայացվեց մասնակցել հունիսի 20-ին նախանշված ԱԺ արտահերթ ընտրություններին։
Հայ ազգային կոնգրեսի ընտրական ցուցակը կգլխավորի Հայաստանի առաջին նախագահ Լևոն Տեր-Պետրոսյանը, իսկ ընտրական շտաբը՝ կուսակցության փոխնախագահ Լևոն Զուրաբյանը։
Ըստ ՀԱԿ–ի տարածած հայտարարության` հանրության մեծամասնությունը նման ընտրությունները չի դիտարկում որպես ճգնաժամի հանգուցալուծման միջոց։ Մինչդեռ, ՀԱԿ–ը որոշել է մասնակցել ընտրություններին` վստահ, որ կարող է ձևավորել արդար իշխանություն։