Վարդենիսի տարածաշրջանում օրերս գերեվարված հայ զինծառայողներին Հայաստան վերադարձնելու վերաբերյալ դրական տեղաշարժ չկա։ Sputnik Արմենիայի հետ զրույցում ասաց Գեղամասար խոշորացված համայնքի ղեկավար Հակոբ Ավետյանը։
«Ոչ մի դրական լուր չունենք։ Ես միայն ուրախ կլինեմ, որ կարճ ժամանակահատվածում այդ հարցը լուծվի, բայց դեռ որևէ պատասխան չունենք»,- նշեց նա։
Ամեն րոպե դրական լուրի սպասող Ավետյանի ակնկալիքները մեծ չեն, սակայն հույսը չի կորցնում, որ տղաները Հայաստան կվերադառնան։ Նա գործընթացի վրա ազդելու որևէ լծակ չունի, բայց ամենօրյա ռեժիմով հետաքրքրվում է, թե կառավարություն այս ուղղությամբ ինչ է անում։ Իսկ կառավարությունից վստահեցնում են` բանակցում են։
«Գերեվարվածներից մեկն իմ ընկերն է։ Կառավարության ասելով` այս պահին հարցը պետք է բանակցությունների միջոցով լուծել։ Տեսնենք` բանակցություններն ինչ արդյունք կտան։ Աստված տա` լավ լուր լսենք»,- հավելեց Ավետյանը։
Ինչո՞ւ է գերիների հարցով Մուրադովը զբաղվում․ կութեցու հարցը՝ Փաշինյանին
Հիշեցնենք` մայիսի 27-ի առավոտյան ՀՀ Գեղարքունիքի մարզի սահմանային հատվածում, ՀՀ ԶՈւ N զորամասի պահպանության տարածքում ինժեներական աշխատանքներ կատարելիս, ադրբեջանական զինված ուժերի զինծառայողների կողմից շրջափակվել և գերեվարվել են պայմանագրային զինծառայողներ Ա. Ն. Աբգարյանը, Ի. Ա. Սարգսյանը, Վ. Վ. Սարգսյանը, Բ. Ս. Օհանյանը, Ա. Գ. Բուդոյանը և Վ. Օ. Ռաֆայելյանը։
Ի՞նչ է անելու ՀՀ ԶՈւ-ն, եթե Ադրբեջանը չվերադարձնի գերիներին․ ԳՇ պետի տեղակալի պարզաբանումը
