ԵՐԵՎԱՆ, 20 նոյեմբերի — Sputnik. ՌԴ ԱԳ նախարար Սերգեյ Լավրովը հայտարարել է, որ շատ հարցեր, որոնք կբերեն ղարաբաղյան հակամարտության խաղաղ կարգավորմանն արդեն որոշակի հստակեցվել են, հաղորդում է ՌԻԱ Նովոստին։
«Հակամարտության գոյությունը ոչ մեկի շահերից չի բխում, պետք է ելքեր գտնել, մանավանդ, որ շատ ուղղություններ, որ կբերեն խաղաղ կարգավորմանը, արդեն հստակեցվել են»,–ասել է Լավրովը։
Նա նաև նշել է, որ դեռ շարունակվում է խաղաղ կարգավորման երկուստեք ընդունելի ուղիների որոնումը, որոնք ընդգծվել են Մոսկվայում կայացած համանախագահների և Հայաստանի ու Ադրբեջանի ԱԳ նախարարների վերջին հանդիպման ժամանակ։
Լավրովի խոսքով` ԵԱՀԿ ՄԽ ձևաչափի ընդլայնումը ղարաբաղյան հակամարտության կարգավորման հարցում ընդունելի չէ և կխեղի ձևաչափի նպատակը։
«Կա համաձայնեցված ձևաչափ` 3 համանախագահ։ Նրանք միասին են գործում` ԵԱՀԿ ՄԽ շրջանակում, նրանք իրարից անկախ գոյություն չունեն։ Այստեղ առկա են բոլոր այն երկրների ներկայացուցիչները, որոնք քիչ թե շատ հետաքրքրված են խնդրի կարգավորմամբ»,–ասել է նախարարը։
Բաքու այցից հետո Սերգեյ Լավրովը կժամանի նաև Հայաստան։ Հայաստանի մայրաքաղաքում ՌԴ ԱԳ նախարարը հանդիպում կունենա իր գործընկեր Էդվարդ Նալբանդյանի և նախագահ Սերժ Սարգսյանի հետ։