ԵՐԵՎԱՆ, 10 հունիսի — Sputnik. Թուրքիայի խորհրդարանի պոլսահայ պատգամավոր, քրդամետ ընդդիմադիր «Ժողովուրդների դեմոկրատական կուսակցության» (ԺԴԿ) ներկայացուցիչ Կարո Փայլանը հանդիպել է Դիարբեքիրի ընտրողների հետ։
Հիշեցնենք` հունիսի 24-ին Թուրքիայում արտահերթ խորհրդարանային ու նախագահական ընտրություններ կանցկացվեն։ Հայ պատգամավորը Դիարբեքիրից իր թեկնածությունն է ներկայացրել։ Փայլանը հանդիպել է քաղաքի բնակիչների հետ, փոխանցել է նրանց ազատազրկման մեջ գտնվող «Ժողովուրդների դեմոկրատական կուսակցության» առաջնորդ Սելահաթթին Դեմիրթաշի ողջունները։
Instagram-ի իր էջում քաղաքական գործիչը բնակիչների հետ հանդիպումից լուսանկարներ է տեղադրել ու մեկնաբանել է․ «Շարունակում ենք աշխատել ԺԴԿ-ի համար օրեկան 24 ժամ»։
Բաժանոդրներից մեկը Փայլանին գրում է, որ Դիարբեքիրին իր պատմական անվանումը՝ Տիգրանակերտը, վերադարձնելու հնարավորություն է ընձեռվել։ Տիգրան Մեծի օրոք այն Մեծ Հայքի մայրաքաղաքն է եղել։
Ավելի վաղ ԺԴԿ-ի առաջնորդ Դեմիրթաշն ասել էր, որ Դիարբեքիրի բնիկները հայերն են։
