ԵՐԵՎԱՆ, 20 օգոստոսի — Sputnik. Անկարայում ԱՄՆ-ի դեսպանատան մոտ հրաձգությունը քաոս առաջացնելու փորձ է: Այս մասին Twitter–ի իր էջում գրել է Թուրքիայի նախագահի մամուլի քարտուղար Իբրահիմ Կալընը։
«Մենք դատապարտում ենք Թուրքիայում ԱՄՆ-ի դեսպանատան վրա կատարված հարձակումը: Այն քաոս առաջացնելու փորձ է։ Թուրքիան անվտանգ երկիր է։ Բոլոր դիվանագիտական ներկայացուցչությունները գտնվում են պետական պաշտպանության ներքո»,- նշել է Կալընը:
Թուրքիայում իշխող Արդարության և զարգացման կուսակցության ներկայացուցիչ Օմեր Չելիքն իր հերթին ԱՄՆ-ի դեսպանատան մոտ տեղի ունեցած միջադեպը սադրանք է անվանել:
Հիշեցնենք, որ միջադեպը տեղի էր ունեցել օգոստոսի 20-ին, ժամը 5։00–ի սահմանում (Երևանի ժամանակով` 6։00-ին)։ Աթաթուրքի փողոցով ընթացող սպիտակ մարդատար ավտոմեքենայից 4-5 կրակոց է արձակվել դեսպանատան ուղղությամբ։ Գնդակոծվել է դիվանագիտական առաքելության անվտանգությունն իրականացնող ոստիկանության պահակակետը։ Միջադեպի հետևանքով տուժածներ չկան։
ԱՄՆ-ն պատժամիջոցներ է սահմանել Թուրքիայի արդարադատության նախարարության և ՆԳՆ ղեկավարների նկատմամբ` ամերիկացի հոգևորական Էնդրյու Բրանսոնին կալանավորելու պատճառով։ Ավելին` ԱՄՆ նախագահ Դոնալդ Թրամփը հավանություն է տվել Թուրքիայից ներկրվող ալյումինի և պողպատի մաքսային տուրքերի ավելացմանը, որպեսզի դրանք համապատասխանաբար 20 և 50 տոկոս կազմեն։