ԵՐԵՎԱՆ, 22 օգոստոսի — Sputnik. Թբիլիսում օգոստոսի 20–ին տեղի ունեցած խոշոր ավտովթարից տուժած 2 ՀՀ քաղաքացիներն այսօր դուրս են գրվել հիվանդանոցից, իսկ նախօրեին տուժածներից մեկը տեղափոխվել էր Հայաստան` այստեղ բուժումը շարունակելու համար։
Ինչպես տեղեկացնում է ՀՀ ԱԻՆ մամուլի ծառայությունը, օգոստոսի 22-ին, ժամը 16:00-ին «911» ծառայությանը տեղեկություն է հաղորդվել, որ տուժած 7–ամյա Նանե Խաչատրյանը և 32–ամյա Անի Ավանեսյանը դուրս են գրվել համապատասխանաբար Իյաշվիլի մանկական և «Խիրուրգիչեսկոյե Նացիոնալնոյե» բժշկական կենտրոններից: Իսկ օգոստոսի 21-ին նույն ավտովթարից տուժած Անժելա Շալվարյանը (ծնված 1970 թ.) տեղափոխվել է Հայաստանի Հանրապետություն՝ բուժումը շարունակելու նպատակով:
Հաղորդվում է, որ մնացյալ տուժածների առողջական վիճակը դեռ նույնն է:
Հիշեցնենք, որ օգոստոսի 20-ին, ժամը 05:14-ին Վրաստանի ՆԳՆ ԱԻ դեպարտամենտի օպերատիվ հերթապահից տեղեկություն է հաղորդվել, որ ժամը 02:58-ին Թբիլիսի քաղաքի Պռավայա Նաբերեժնայա փողոցում՝ «Ելյավա» շուկայի մոտակայքում, բախվել են «Mercedes» մակնիշի Minivan և «Mercedes CLK» մակնիշի (վարորդը՝ Օլեգ Օմարով, ծնված 1972 թ., Վրաստանի Հանրապետության քաղաքացի) ավտոմեքենաները:
«Mercedes CLK» մակնիշի վարորդը` Օլեգ Օմարովը, Նանե Խաչատրյանը (ծնված 2011 թ.), Արա Խաչատրյանը (ծնված 1981 թ.), Արփինե Մամյանը (ծնված 1986 թ.). Մարիա Պանյանը (ծնված 1989 թ.), Անդրանիկ Գինոսյանը (ծնված 1995 թ.) և ևս 3 ՀՀ քաղաքացի հոսպիտալացվել են Թբիլիսի քաղաքի «Ռեսպուբլիկանսկոյե», «Գուդուշաուրի», «Թբիլիսկոյե», «Ցենտրալնոյե» և «Խիրուրգիչեսկոյե Նացիոնալնոյե» ԲԿ-ներ:
Օգոստոսի 20-ին, ժամը 11:46-ին «911» ծառայությանը տեղեկություն է հաղորդվել, որ Մարիա Պանյանը (ծնված 1989 թ.) մահացել է:
