ԵՐԵՎԱՆ, 14 փետրվարի — Sputnik. ՀՀ վարչապետ Նիկոլ Փաշինյանը ցավակցական հեռագիր է հղել Իրանի նախագահ Հասան Ռոհանիին: Ինչպես հայտնում են վարչապետի աշխատակազմից հեռագրում մասնավորապես, ասված է.
«Խորապես ցնցված եմ Իրանի Սիսթան-Բելուջիսթան նահանգում ավտոբուսի վրա ահաբեկչական հարձակման լուրից, որը մի քանի տասնյակ զոհերի պատճառ դարձավ:
Իմ խորին ցավակցությունն եմ հայտնում Ձեզ և բարեկամ Իրանի ողջ ժողովրդին այս ողբերգական իրադարձության կապակցությամբ:
Խնդրում եմ իմ սփոփանքի խոսքերը փոխանցել զոհվածների ընտանիքներին և մերձավորներին՝ մաղթելով ոգու արիություն և տոկունություն, իսկ վիրավորներին՝ շուտափույթ ապաքինում»:
Հիշեցնենք, երեկ Իրանի հարավ-արևելքում տեղի ունեցած ավտոբուսի պայթյունի հետևանքով զոհվել է Իսլամական հեղափոխության պահապանների կորպուսի առնվազն քսան զինվորական, ևս քսանը վիրավորվել են:
Կորպուսի ավտոբուսը հարձակման էր ենթարկվել «Ջեյշ ալ-Ադլ» ահաբեկիչական կազմակերպության զինյալների կողմից::
