ԵՐԵՎԱՆ, 25 մայիսի — Sputnik. Իր ժողովրդի իրավունքների պաշտպանության խնդիրներով զբաղվող ռուսաստանաբնակ Զահիրադդին Իբրահիմին, որն այս օրերին Հայաստանում է՝ «Թալիշագիտական միջազգային 3-րդ գիտաժողովին» մասնակցելու նպատակով, բավականին դիպուկ նկատում է, որ ադրբեջանական պետության ղեկավարությունը միայն ժողովրդավարության կամ մարդու իրավունքները հարգելու իմիտացիայով է զբաղված:
Sputnik Արմենիայի հետ զրույցում Զահիրադդին Իբրահիմին նշում է. «Թալիշները, ինչպես Ադրբեջանի մյուս բնիկ (ավտոխտոն) ժողովուրդները ոչ մի քաղաքական իրավունք չունեն: Ժողովուրդների կոլեկտիվ իրավունքները ոտնահարվում են պետական մակարդակով: Պետությունն անգամ չի ճանաչում նրանց, որպես առանձին ազգություն: Ադրբեջանի սահմանադրությամբ ամրագրված է, որ ադրբեջանական ժողովուրդն անբաժանելի է: Իսկ ասելով «ադրբեջանական ժողովուրդ»՝ իրենք նկատի ունեն միայն թուրքերին: Ու ասում են՝ ադրբեջանցիներն ու թուրքերը մեկ ազգ են: Բայց, թալիշներն ինչպես կարող են թուրք լինել, եթե թալիշ են»:
Թալիշ հասարակական գործիչը, որ գիտաժողովում հանդես եկավ «Ադրբեջանական ազգայնականությունը` Հարավային Կովկասի տարածաշրջանի կայունության և անվտանգության սպառնալիք» զեկույցով, նկատում է, որ իրեն հաճախ են հարցեր ուղղում, թե ինչո՞ւ եք ձեզ՝ թալիշներիդ առանձնացնում:
«Ես ասում եմ՝ եթե ես ինձ թուրք կոչեմ, դա մեծ սուտ կլինի: Ես չեմ ուզում ստել: Եթե անգամ նշեմ, որ ես թուրք եմ, դա ոչ միայն ինքնախաբեություն, այլև հասարակությանը մոլորեցնել կլինի: Ես թուրք չեմ, ախր»,-նշում է Զահիրադդին Իբրահիմին:
Նրա բնորոշմամբ, Ադրբեջանում պետական քաղաքականությունը նպատակաուղղված է համատարած էթնոցիդի՝ բոլոր ասպեկտներով, նույնիսկ կենցաղային մակարդակով քարոզվում է թուրքական ազգայնականություն:
Դրան զուգահեռ, ինչպես հանրահայտ իրողություններն արձանագրելով նշում է մեր զրուցակիցը, Ադրբեջանում ձևավորվել է կլանային պետություն, մեկ կլան արդեն ավելի քան երկու տասնամյակ զավթել է իշխանությունը, բայց միաժամանակ ձգտում է ժողովրդավարություն ցուցադրել՝ լինելով եվրոպական կառույցներում ընդգրկված ու ստանձնելով որոշակի պարտավորություններ, այդ թվում՝ ազգային փոքրամասնությունների և բնիկ ժողովուրդների մասով:
Բաքուն, իհարկե, չի կատարում իր իսկ ստանձնած պարտավորությունները նաև այդ ուղղությամբ:
«Ադրբեջանում հիմա ոչ մի ժողովրդավարական իրավունքներ ու ազատություններ չկան: Իշխանությունը միայն ժողովրդավարության իմիտացիա է անում»,-ասում է Զահիրադդին Իբրահիմին:
Այդ ամենից զատ, վերջին շրջանում Ադրբեջանում որոշակիորեն պատրաստություններ են տեսնում Իրանին ԱՄՆ-ի կողմից հարվածելու հնարավորության հետ կապված: Մեր զրուցակիցը նշում է, օրինակ, որ վերջերս Բաքվում տեղի է ունեցել խորհրդակցություն, որին մասնակցել են այսպես ասած՝ «իրանական անջատողականներն» ու Ադրբեջանի խորհրդարանի (Միլլի մեջլիս – ազգային ժողով կամ խորհուրդ) պատգամավորները: Քննարկված հիմնական թեմաներից մեկն այն է եղել, որ եթե ԱՄՆ-ն հարված հասցնի Իրանին, ապա հյուսիսային Իրանում կտրուկ ակտիվանալու են անջատողականները՝ այսպես կոչված «հարավային Ադրբեջանը» պոկելու և Ադրբեջանին միավորելու նպատակով:
Թալիշ գործչի խոսքով, Բաքվում որոշակիորեն պատրաստվում են դեպքերի զարգացման նման սցենարի: