ԵՐԵՎԱՆ, 21 հուլիսի — Sputnik. Ախալցխա քաղաքում գտնվող հայկական եկեղեցուց գողացել են վաճառքի համար նախատեսված խաչեր, նկարներ և 200 լարի։ Ինչպես հաղորդում է Nor.ge պարբերականը, գողությունը ենթադրաբար կատարվել է հուլիսի 16-ի գիշերը։
Քահանա Հակոբ Սահակյանը պատմել է, որ հուլիսի 17-ի առավոտյան նա եկեղեցի է գնացել և հայտնաբերել, որ նվիրատվությունների արկղը դատարկ է, փողերը գողացել են վաճառքի դրված եկեղեցական իրերի հետ միասին։
«Չեմ պատկերացնում՝ ով կարող էր դա անել, նման դեպք չի եղել։ Ես զանգահարեցի ոստիկանություն, նրանք եկան, բայց չգիտեմ՝ ինչ-որ մեկին ձերբակալել են, թե ոչ», - ասել է քահանան։
Վրաստանի ներքին գործերի նախարարությունը սկսել է գործի հետաքննությունը 177 հոդվածի Ա և Բ մասերով, որը ենթադրում է անօրինական ներթափանցում շենք և կողոպուտ։ ՆԳՆ-ում պնդում են, որ հանցագործին գտել են, բայց նա դեռ ձերբակալված չէ։
