ԵՐԵՎԱՆ, 20 օգոստոսի — Sputnik. «Ռուսթավի–2» վրացական հեռուստաընկերության նոր գլխավոր տնօրեն Պաատա Սալիան այսօր հայտնել է մի քանի լրագրողների գործից ազատելու մասին։ Նրանց շարքում է սկանդալային Գեորգի Գաբունիան, որը հունիսին ուղիղ եթերում հայհոյել էր ՌԴ նախագահ Վլադիմիր Պուտինին։ Այս մասին հայտնում է RT–ն։
Այս պահին Գաբունիան ու ընկերության մի շարք աշխատակիցներ արձակուրդի մեջ են ու պաշտոնապես կազատվեն աշխատանքից, երբ վերադառնան։
Մամուլի ասուլիսի ժամանակ Պաատա Սալիան ասել է, որ աշխատակիցներին գործից ազատելը կապված է ֆինանսական խնդիրների, նաև ընկերության համբավին հասցված վնասի հետ։ Նոր գլխավոր տնօրենը նաև նախատեսում է դատի տալ նրանց։
Վրաստանի ղեկավարությունը պետք է ներողություն խնդրի. Թինա Կանդելակին` սկանդալի մասին
Հիշեցնենք, որ Վրաստանի ամենահայտնի հաղորդավարներից մեկը` Գեորգի Գաբունիան իր ծրագրերից մեկը սկսել էր Ռուսաստանի նախագահ Վլադիմիր Պուտինին ուղղված հայհոյանքներով։ Մեկուկես րոպեի ընթացքում Գաբունիան, մեղմ ասած, անպարկեշտ բառերով էր խոսել ՌԴ նախագահի մասին։ Հաղորդավարը չէր խորշել նողկալի բառեր ասել Պուտինի ծնողների հասցեին` ընդգծելով, որ նրանք արդեն ողջ չեն։
Ռուսաստանի նախագահ Վլադիմիր Պուտինը մեկնաբանել էր «Ռուսթավի 2»–ի հաղորդավարի հնչեցրած վիրավորանքների պատճառով առաջացած սկանդալը` նշելով, որ «մեծ պատիվ կլինի նրա համար ինչ-որ քրեական գործեր հարուցելը»։
