ԵՐԵՎԱՆ, 12 մարտի — Sputnik. Ադրբեջանում գրանցվել է կորոնավիրուսի վարակից մահանալու առաջին դեպքը։ Այդ մասին հայտնում է ՌԻԱ Նովոստին` հղում անելով երկրի կառավարությանն առընթեր օպերատիվ շտաբին։
Մահացած կինը Ադրբեջանի քաղաքացի է, ավելի վաղ նա եղել էր Իրանում։ Կինը կարանտինի մեջ էր։
«Նրա մոտ կորոնավիրուսի վարակի ախտանշաններ էին հայտնաբերվել։ Նա կարանտինի մեջ էր, սակայն կյանքը փրկել չհաջողվեց»,–շտաբից հայտնել են ՌԻԱ Նովոստիին։
Նշենք, որ վերջին տվյալների համաձայն` Ադրբեջանում կորոնավիրուսով վարակվածների թիվը կազմում է 15 մարդ։ Ավելի վաղ հայտնել էին կարանտինում գտնվող 50 քաղաքացու մասին։
Ադրբեջանի ղեկավարությունը կորոնավիրուսի տարածման սպառնալիքի պատճառով կոչ է արել բնակչությանը հետաձգել մոտակա ամիսներին ծրագրված հարսանիքներն ու մասսայական սգո արարողությունները։
«Թումոն» մեկ ամիս փակ կլինի. կորոնավիրուսով վարակված իտալացին այդ շենքում է աշխատել
Բացի հարսանեկան արարողությունների և տոնակատարությունների չեղարկումից, իշխանությունները խորհուրդ են տալիս խուսափել մարդկանց կուտակումներից, արտասահմանյան ուղևորություններից, կատարել պաշտպանիչ միջոցառումներ (բժշկական դիմակներ, պաշտպանիչ ակնոցներ, մանրէազերծող միջոցներ)։
Ավելին` կորոնավիրուսի սպառնալիքի պատճառով իշխանությունները չեղարկել են Նովրուզի տոնակատարությունները։
