20:40 27 հունվարի 2021
Ուղիղ եթեր
  • USD518.16
  • GBP711.59
  • EUR628.06
  • RUB6.89
Տարածաշրջան
Ստանալ կարճ հղումը
428 0 0

Եթե Վրաստանը չբացի սահմանները ՀՀ քաղաքացիների համար, ռիսկի տակ կդնի իր զբոսաշրջային ոլորտը։ Սակայն Հայաստանի այդ ոլորտի մասնագետները հասկանում են հարևանների դիրքորոշումն ու մտադիր են օգնել այդ նուրբ հարցում։

Լաուրա Սարգսյան, Sputnik Արմենիա

Վրաստան մուտք գործելու ՀՀ քաղաքացիների վրա տարածվող սահմանափակման հնարավոր երկարացումը բացասաբար կանդրադառնա այդ երկրի զբոսաշրջության ու որպես հետևանք՝ տնտեսության վրա։ Ավելին՝ կտուժեն օտարազգիների համար նախատեսված տարածաշրջանային փաթեթները, որոնց վրա տարիներ շարունակ միասին աշխատել ու գովազդել են Հայաստանի ու Վրաստանի զբոսաշրջության ոլորտի ներկայացուցիչները։ Սրանում վստահ է Հայկական զբոսաշրջության ֆեդերացիայի նախագահ Մեխակ Ապրեսյանը։

Բանն այն է, որ օրերս Վրաստանի Հիվանդությունների վերահսկման և հանրային առողջության ազգային կենտրոնի տնօրեն Ամիրան Գամկրելիձեն հայտնել էր, որ Վրաստանը չի կարող բացել իր դռներն այն զբոսաշրջիկների համար, որոնք գալիս են վարակվածության բարձր ցուցանիշներով երկրներից։ Հաշվի առնելով կորոնավիրուսի համավարակի աճող թվերը՝ Հայաստանն այս երկրներին շարքին է դասվում։

Ավելի վաղ ՀՀ վարչապետ Նիկոլ Փաշինյանն անուղղակիորեն պատասխանել էր այդ հայտարարությանը։ Նա ասել էր, որ հարցը, թե որ երկրները կբացեն սահամանները  ՀՀ քաղաքացիների համար ու որոնք` ոչ, կախված է մեր երկրում տիրող համաճարակային իրավիճակից, որը հատկապես վերջին շաբաթվա ընթացքում շատ մտահոգիչ է։

Sputnik Արմենիայի թղթակցի հետ զրույցում Ապրեսյանը նույնպես նշեց, որ ամեն ինչ կախված է նրանից, թե ինչ տեմպով է վարակը շարունակելու տարածվել Հայաստանում։ Նրա խոսքով՝ Գամկրելիձեի հայտարարությունը պաշտոնական չէ։ Պետք է սպասել Թբիլիսիի պաշտոնական դիրքորոշմանն այս հարցի շուրջ։

«Հայաստանը Վրաստանի երեք հիմնական շուկաներից է`զբոսաշրջային ոլորտում, հատկապես՝ ամռանը։ Գաղտնիք չէ, որ Սև ծովի ափին հանգստացողների մեծ մասը հենց հայեր են», - ասաց Ապրեսյանը։

Նա հիշեցրեց, որ 2019 թվականին Վրաստան այցելությունների  թվով Հայաստանը երրորդ տեղն (1 365 048 քաղաքացի) է զբաղեցրել Ադրբեջանից (1 526 619) ու Ռուսաստանից (1 471 558) հետո։

Կորոնավիրուսն ուսումնասիրել է պետք. Մյասնիկովը` վրացական կարանտինի և Փաշինյանի մասին

Թվերն ինքնին ամեն ինչ ասում են․առանց հայաստանցի զբոսաշրջիկների Վրաստանը չի կարող ոտքի հանել զբոսաշրջության ոլորտը, որի վրա հիմնված է երկրի տնտեսությունը, ու մեծ կորուստներ կունենա։

Փորձագետի խոսքով՝ մի կողմից վրացական իշխանության դիրքորոշումը հասկանալի է․նրանք չեն ուզում շվեդական մոդելով առաջնորդվել ու այսքան միջոցներից ու սահմանափակումներից հետո ռիսկի դիմել։ Մյուս կողմից՝ Ապրեսյանն այս ամենն անհասկանալի է համարում։

«Չկա ոչ մի երկիր, որին կորոնավիրուսի համավարակը չի հասել։ Կարևոր չէ, որ մի երկրում հիվանդները շատ են, մյուսում՝ քիչ։ Եթե բացում են, բոլորի համար պետք է բացեն։ Հատկապես, եթե պատրաստվում են երկիր մուտք գործելուց 72 ժամ առաջ ՊՇՌ-թեստավորման արդյունքի ներկայացման պահանջ մտցնել», - ասաց նա։

Փորձագետը կարծում է՝ ժամանակն է, որ Հայաստանն էլ կողմնորոշվի այդ հարցում։ Նա խորհուրդ է տալիս նախապես գնահատել ռիսկերն ու միջին տարբերակը գտնել, որը վերջնականապես չի սպանի առանց այդ էլ մահամերձ վիճակում գտնվող հայաստանյան զբոսաշրջությունը։

Վրաստանի զբոսաշրջության ոլորտի մասնագետները Sputnik Արմենիայի հետ զրույցում նույնպես նշել են, որ Վրաստանը դեռ մտածում է՝ ինչ սկզբունքով է թույլ տալու զբոսաշրջիկներին մուտք գործել երկիր։ Ավելին՝ նրանք նշել են, որ այդ թեմայով դեռ պաշտոնական որոշում չի կայացվել ու վաղ է եզրակացություններ անել։

Արդյո՞ք Հայաստանն այն երկրների շարքում է, որոնց հետ Վրաստանը բանակցում է զբոսաշրջիկների համար այսպես կոչված «անվտանգ միջանցքի» վերաբերյալ։ Sputnik Արմենիայի թղթակցին այս հարցով դիմել է Վրաստանի էկոնոմիկայի ու կայուն զարգացման նախարարություն, նաև ԱԳՆ։

Հրապարակման պահին մենք պատասխան չէինք ստացել Վրաստանի էկոնոմիկայի նախարարությունից։ Իսկ արտգործնախարարությունը սահմանափակվել է կարճ հաղորդագրությամբ։

 «Վրաստանում դեռ ուժի մեջ են կարգավորումները, որոնք մտցվել են կորոնավիրուսային վարակի տարածումը կանխելու համար։ Դրանք չեն նախատեսում օտարազգիների մուտքը երկիր։ Եթե որևէ բան փոխվի, համապատասխան հայտարարություն կարվի»։

Ինչ վերաբերում է Հայաստանում գտնվող Վրաստանի քաղաքացիներին, ԱԳՆ-ից ասացին, որ նրանք կարող են ցամաքային ճանապարհով հայրենիք վերադառնալ, սակայն պետք է հետո երկու շաբաթ պարտադիր կարանտինի մեջ մնան։

Փաշինյանն ասաց` երբ կորոնվիրուսի հարցով կդիմեն Վրաստանին

ՀՀ ԱԳՆ-ում նույնպես հիշեցրեցին, որ Վրաստանում դեռ ուժի մեջ է արտասահմանցիների մուտք գործելու արգելքը։

«Հիշեցնեմ՝ Հայաստանում մինչ հունիսի 13-ն արտակարգ դրության ռեժիմ է գործում։ Հետևաբար, Հայաստան մուտք գործելու ու երկիրը լքելու սահմանափակումը պահպանվում է մինչ արտակարգ դրության ռեժիմի ավարտը», - մեզ հետ զրույցում ասաց ՀՀ ԱԳՆ մամուլի քարտուղար Անահիտ Նաղդալյանը։

Հետևաբար, քաղաքացիների տեղաշարժման սահմանափակումները հենց դրանով են պայմանավորված։

Հունիսի 4–ի դրությամբ՝ Հայաստանում SARS-CoV-2 կորոնավիրուսային վարակի նոր տեսակի 11 221 դեպք է բացահայտվել։ Վրաստանում՝ 801։

Ըստ թեմայի

Առանց զբոսաշրջիկների և սփյուռքահայերի հեշտ չի լինի. Երևանի սրճարանները բացվել են
Զբոսաշրջային կազմակերպությունները կառավարությունից վարկային արձակուրդ են ակնկալում
Քարուքանդ ճանապարհները խանգարում են. Արփի լիճն ավելի գրավիչ կդառնա զբոսաշրջիկների համար
թեգերը:
կարանտին, կորոնավիրուս, զբոսաշրջություն, Զբոսաշրջիկ, Սև ծով, Վրաստանի Հանրապետություն, Հայաստան

Գլխավոր թեմաներ