ԵՐԵՎԱՆ, 9 օգոստոսի - Sputnik. Վրաստանի ոստիկանության աշխատակիցները հայաբնակ Սամցխե–Ջավախքի շրջանում տեղի ունեցած անկարգություններից հետո ձերբակալել են մի տղամարդու, որը կասկածվում է նախօրեին կատարված սպանության մեջ:
Նախօրեին Վրաստանի հայաբնակ Ախալքալաք քաղաքում (Սամցխե–Ջավախքի շրջան) ծեծկռտուք էր տեղի ունեցել երիտասարդների միջև, որի հետևանքով մեկ մարդ մահացել է։ Դրանից հետո քաղաքում բախումներ են սկսվել։ Տղամարդկանց ամբոխը սկսել է կոտրել հյուրանոցի դռներն ու պատուհանները, այնուհետև այրել հյուրանոցի սեփականատիրոջ տունը։ Ընդհանուր առմամբ այրվել է 4 տուն։
Ինչպես այսօր հայտնում է Վրաստանի ՆԳՆ մամուլի ծառայությունը՝ հետաքննություն է ընթանում կանխամտածված սպանություն, ապօրինի զենք պահելու և ուժ կիրառելու հոդվածներով։
Քննության տվյալներով՝ պատճառը վեճն է եղել, որը վերածվել է ծեծկռտուքի։ Միջադեպի ժամանակ 37 տարեկան Ա.Գ.–ն ենթադրաբար կրակել է 27-ամյա Վ.Մ.ին, որը հիվանդանոցի ճանապարհին մահացել է։
Մի քանի ժամ անց ոստիկանությունը ձերբակալել է սպանության մեջ կասկածվող Ա.Գ.–ին։
