ԵՐԵՎԱՆ, 14 ապրիլի – Sputnik. Հայաստանն Իրանում առևտրային կցորդ կունենա։ Նման առաջարկով հանդես է եկել ՀՀ էկոնոմիկայի նախարարությունը։
Կառավարության համապատասխան որոշումը` նախարարության առաջարկի հիման վրա նախատեսվում է քննարկել ու ընդունել կառավարության վաղվա` ապրիլի 15-ի նիստում։
Թե ով կզբաղեցնի այդ պաշտոնը, առայժմ հայտնի չէ։ Փոխարենը հայտնի է, որ առևտրական կցորդի գրասենյակը գտնվելու է Իրանում։
«Հայաստանից ԻԻՀ կգործուղվի համապատասխան պաշտոնյա գիտակ անձ՝ առևտրական կցորդ, ով պատշաճ և մշտական հիմունքներով կարող է ապահովել Հայաստանի տնտեսավարների շահերի պաշտպանությունն իրանական շուկայում։ Նա պատշաճ ձևով կներկայացնի նաև մեր երկրի առաջնահերթությունները, տնտեսության զարգացման պահանջներից բխող առևտրատնտեսական ոլորտի համագործակցությանն ուղղված առաջարկությունները, առևտրային մասով ՀՀ-ում օրենսդրությամբ սահմանված կանոնակարգումները»,– ասված է կառավարության որոշման նախագծում։
Ընդ որում, առաջին դրական արդյունքներն Իրանի հետ տնտեսական հարաբերություններում կառավարությունն ակնկալում է առևտրական կցորդի նշանակումից 6 ամիս հետո։
Նշենք, որ պաշտոնական վիճակագրության համաձայն` Հայաստանի ու Իրանի առևտրաշրջանառությունը 2020 թվականին կազմել է 400 200 000 ԱՄՆ դոլար, որից 84 800 000–ը` Հայաստանից արտահանման ցուցանիշն է, 315 400 000–ը` Իրանից Հայաստան ներմուծումը։
Արտակ Դավթյանն ընդունել է Իրանի դեսպանին. քննարկել են 2 երկրների համագործակցության հարցեր
Ինչ վերաբերում է առևտրային կցորդի ինստիտուտին, ապա այն Հայաստանում ներդրվել է 2004-2005 թվականներից։
Այսօր Հայաստանի Հանրապետության առևտրական կցորդներ ունի Չինաստանում, Բելառուսում, Ավստրիայում, Շվեյցարիայում ու Թուրքմենստանում։
