«Գոնին» նահանջում է. ջերմանավերը սկսել են ուղևորություններ իրականացնել դեպի Չինաստան

ԵՐԵՎԱՆ, 28 օգոստոսի– Sputnik. «Գոնի» թայֆունի վտանգն անցնելուց հետո Ամուր գետի վրայով Խաբարովսկ–Ֆույուան երթուղով զբոսաշրջիկներ տեղափոխող ջերմանավերն ուրբաթ վերսկսել են երթևեկությունը։ Այս մասին հայտնել է Չինաստանում զբոսաշրջային գործակալության ներկայացուցիչը։

Ճապոնիայում թայֆունից տուժել է առնվազն 109 մարդ, չեղյալ են հայտարարվել ավելի քան 300 ներքին ավիաչվերթեր։ Չորեքշաբթի թայֆունը հասել է Պրիմորիեի երկրամաս։ Հինգշաբթի օրվա կանխատեսման համաձայն, այն պետք է հասներ Չինաստանի հյուսիսարևելյան նահանգներ և Խաբարովսկի երկրամասի հարավային շրջաններ։

Ցիկլոնի մոտենալու հետ կապված` հինգշաբթի չեղյալ են հայտարարվել Խաբարովսկի և չինական Ֆույուան քաղաքի միջև ջերմանավերի ուղևորությունները, որոնց միջև Ամուրի վրայով երկու ժամվա ճանապարհ է։ Հիմնականում ռուս զբոսաշրջիկները մեկնում են Ֆույուան` հագուստ և կենցաղային ապրանքներ գնելու համար։

«Ուրբաթ ջերմանավերի երթևեկությունը երկու կողմերից վերսկսվել է, զբոսաշրջիկները ժամանում են Ֆույուանից, իսկ մեր կողմից մեկնում են Չինաստան»,– ասել է զրուցակիցը։

Ինչպես պարզաբանել են ԱԻՆ–ում, Խաբարովսկի երկրամասի և Հրեական ինքնավար մարզի վրա ցիկլոնի ազդեցության ուժի վերաբերյալ կանխատեսումները չեն արդարացել։ Խաբարովսկի երկրամասում, օրինակ, նախօրեին անձրև է եկել։