Ֆրանսիան հրապարակել է «Միստրալների» համար Ռուսաստանին վճարած փոխհատուցման հստակ գումարը

ԵՐԵՎԱՆ, 3 սեպտեմբերի– Sputnik. Ֆրանսիան Ռուսաստանին է վճարել 949 մլն 754 հազար 849 եվրոյի փոխհատուցում «Միստրալ» տիպի երկու ուղղաթիռակիրները Ռուսաստանին չմատակարարելու համար, նշվում է Փարիզի և Մոսկվայի միջև ստորագրված համաձայնագրի վավերացման օրինագծում, որը հրապարակվել է Ֆրանսիայի Խորհրդարանի ստորին պալատի կայքում։

Ներկայացված փաստաթղթում նշվում է, որ վեճի կարգավորման համաձայնագիրը ստորագրվել է Մոսկվայում 2015թ.–ի օգոստոսի 5–ին։ Ֆրանսիայի կողմից համաձայնագիրը ստորագրել է Ֆրանսիայի «Միստրալների» խնդրի կարգավորման հարցով հատուկ ներկայացուցիչ Լուի Գոտիեն, Ռուսաստանի կողմից` փոխվարչապետ Դմիտրի Ռոգոզինը։

Վճարման գումարից բացի, փաստաթղթում նշվում է, որ Փարիզն իրավունք չունի երրորդ կողմին փոխանցել նավերը մինչև Մոսկվան չստանա ողջ փոխհատուցումը։

Համաձայնագրի ևս մի կետով ամրագրված է, որ որևէ երրորդ կողմ, որը կարող էր վնաս կրել «Միստրալների» մատակարարման պայմանագրի խզման հետևանքով, իրավունք չունի հավակնել փոխհատուցման։

Օրինագիծը սեպտեմբերի 16–ին կներկայացվի Ֆրանսիայի խորհրդարանի միջազգային հարցերի հանձնաժողովի քննարկմանը։

Օգոստոսի սկզբին հայտնի դարձավ, որ Ռուսաստանի և Ֆրանսիայի նախագահներ Վլադիմիր Պուտինն ու Ֆրանսուա Օլանդը որոշել են դադարեցնել «Միստրալ» տիպի երկու ուղղաթիռակիրների կառուցման և մատակարարման պայմանագրի գործողությունները։

Ավելի վաղ չէր հրապարակվել այն գումարի չափը, որը Փարիզը փոխանցել էր Մոսկվային։ Իսկ Ֆրանսիայի պաշտպանության նախարար Ժան–Իվ Լե Դրիանը բազմիցս հայտարարել է, որ այն 1,2 մլրդ եվրոյից պակաս է, որը Ֆրանսիան ստացել էր որպես կանխավճար։

«Միստրալ» տիպի երկու ուղղաթիռակիրների մատակարարման պայմանագիրը կնքվել է 2011թ.–ին ֆրանսիական DCNS/STX–ի և Ռոսօբորոնէքսպորտի միջև։ Ֆրանսիան պետք է «Վլադիվոստոկ» առաջին նավը փոխանցեր նախորդ տարվա նոյեմբերին, սակայն Ուկրաինայում տեղի ունեցող իրադարձությունների պատճառով փոխանցումը տեղի չունեցավ։