ԵՐԵՎԱՆ, 5 փետրվարի- Sputnik. ՀԱՊԿ երկրները պետք է պատրաստ լինեն փախստականների հնարավոր հոսքին, որոնց «վտարել են Եվրոպայից», ուրբաթ լրագրողներին հայտարարեց ՀԱՊԿ գլխավոր քարտուղար Նիկոլայ Բորդյուժան։
Ուրբաթ Մինսկում ընթանում է ՀԱՊԿ երկրների միգրացիոն ծառայությունների ղեկավարների համակարգող խորհրդի նիստը։
«Դուք տեսնում եք, թե այսօր ինչ է տեղի ունենում Եվրոպայում։ Մենք տեսնում ենք, որ որոշ երկրներ սկսում են օրենսդրական, կազմակերպչական միջոցներով դուրս մղել փախստականներին իրենց տարածքներից… Մենք չենք բացառում, որ որոշ ժամանակ անց այդ միգրանտների հոսքը կհայտնվի մեր սահմանների մոտ։ Մենք պետք է պատրաստ լինենք դրան»,- ասել է Բորդյուժան։
Միգրացիայի հարցերով միջազգային կազմակերպության տվյալներով` 2016թ.-ի սկզբից Եվրոպա ժամանած փախստականների թիվը կազմել է ավելի քան 67 հազար մարդ։ Նրանցից ավելի քան 62 հազարը գնացել է Հունաստան։ 2015թ.-ին կազմակերպության տվյալներով ծովային ճանապարհներով եվրոպական ափեր է հասել ավելի քան 1 միլիոն մարդ։ Գերմանիան, Ավստրիան, Ֆրանսիան, Շվեդիան, Դանիան և Նորվեգիան կես տարով սահմանել են սահմանների ժամանակավոր հսկողություն։
