ԵՐԵՎԱՆ, 29 փետրվարի — Sputnik. Հանրահայտ տեղեկատվաժամանցային «Պրոժեկտոր Պերիսհիլթոն» ծրագիրը կրկին էկրաններին կհայտնվի Կանանց միջազգային օրը` մարտի 8-ին, ճիշտ է` այս անգամ ոչ թե հեռուստատեսային ֆորմատով, այլ Մոսկվայի Պուշկինի անվան թատրոնի բեմում, հայտնում է wday.ru-ն:
Այս հումորային ծրագիրը հայտնվել էր ռուսական առաջին ալիքի եթերում 2008 թվականին ու միանգամից գրավել հեռուստադիտողների մեծ մասի սրտերը: Չորս տարվա ընթացքում Գարիկ Մարտիրոսյանը, Իվան Ուրգանտը, Սերգեյ Սվետլակովն ու Ալեքսանդր Ցեկալոն ուրբաթ օրերին քննարկում էին շաբաթվա արդիական թեմաները` մեկնաբանելով թերթերում տպագրված հոդվածներն ու հայտնի մարդկանց ելույթները:
«Այդ նախագիծը նախկինում էլ եղել է համերգային տարբերակով: Չորս համերգ էինք տարեկան տալիս, ոչ ավելի: Եվ միայն այն քաղաքներում էինք հանդես գալիս, որտեղ կարելի էր գնացքով հասնել, քանի որ Գարիկը օդանավ չի նստում: Մենք եղել ենք Պիտերում, Կիևում, Օդեսայում, Եկատերինբուրգում, Ռիգայում, Վիլնյուսում և Տալլինում: Մոսկվայում համերգն առաջին անգամ է անցկացվելու», — ասաց հեռուստահաղորդավար ու պրոդյուսեր Ալեքսանդր Ցեկալոն:
«Մենք որոշեցինք հաղթահարել բոլոր անհաղթահարելի խոչընդոտներն ու հանդիսատեսի հետ անմիջական շփում հաստատել: Հավաքվել,քանի որ այլևս անհնար է սպասել», — խոստովանում է հեռուստահաղորդավար Իվան Ուրգանտը:
«Պրոժեկտոր Պերիսհիլթոնի» տաղավարում հյուրընկալվել են ռուս և օտարազգի աստղերը, ովքեր այս կամ այն պրեմիերայով լինում էին ՌԴ մայրաքաղաքում, իսկ նրանց երաժշտական մանրապատումային տեսանյութերը մինչ օրս մեծ ճանաչում են վայելում սոցցանցերում:
2012 թվականին ծրագիրը փակվեց: Պատճառը երկու հաղորդավարների խիտ ժամանակացույցն էր. Գարիկ Մարտիրոսյանն ու Սերգեյ Սվետլակովը ՏՆՏ հեռուստաալիքի հետ պայմանագիր էին ստորագրել, որի պայմանների համաձայն` նրանք չէին կարող այլ հեռուստաալիքներում աշխատել: Իսկ Առաջին ալիքի գլխավոր տնօրեն Կոնստանտին Էռնստը շոուն ուրիշ հաղորդավարների մասնակցությամբ չէր պատկերացնում: Այդ օրվանից հայտնի քառյակը սկսեց հանդիպել միայն աշխատանքային ժամերից դուրս: