ԵՐԵՎԱՆ, 29 փետրվարի- Sputnik. Մոսկվայի փողոցներից մեկում ձերբակալված կնոջ ձեռքում երեխայի գլուխ է եղել, կինը գոռացել է «Ալլահ աքբար» և խոսել ինքն իր հետ։ Այդ մասին ՌԻԱ Նովոստիին են պատմել առևտրի կետերի աշխատակիցները, ովքեր աղմկահարույց դեպքի ականատեսն են դարձել։
«Նա մոտեցավ մետրոյի «Օկտյաբրսկոյե պոլե» կայարանի մուտքին, ձեռքին` կարմիր տոպրակ, որի միջից հանեց երեխայի գլուխը։ Նա երկար ժամանակ քայլում էր փողոցով և ինչ-որ բան էր գոռում, բայց ոչ ոք չէր մոտենում նրան. բոլորը վախենում էին»,- պատմել է պատահարի ականատեսներից մեկը։ Մեկ այլ ականատեսի խոսքով` կինը փողոցում կտրած գլուխը ձեռքին քայլել է շուրջ 20 րոպե, մինչև նրան ձերբակալել են։
Համացանցում հրապարակված տեսագրություններից դատելով` կինը խոսել է ռուսերեն և սպառնացել անցորդներին։
Ականատեսի խոսքով` արդեն մի քանի րոպե անց հայտնվել է ոստիկանը, բայց երբ փորձել է մոտենալ, կինը ճչացել է, որ հանկարծ չմոտենա, այլապես «ինքը կպայթի»։
«Ավելի ուշ հայտնվեցին մյուս ոստիկանները և փակեցին մայթը` արգելելով, որ որևէ մեկը մոտենա կնոջը, իրենք նույնպես չէին մոտենում, հետո ժամանեցին ոստիկանական մեքենաները, նրան ձերբակալեցին»,- պատմել է ականատեսներից մեկը։
ՌԻԱ Նովոստիի աղբյուրի տվյալով` կնոջ սպառնալիքները կեղծ են եղել. ոստիկանները ռումբ չեն հայտնաբերել։
ՌԴ ՔԿ տեղեկատվության համաձայն՝ դայակն անհայտ պատճառներով կտրել է երեխայի գլուխը, հրկիզել երեխայի ծնողների բնակարանը և փողոց դուրս եկել ոչ ադեկվատ վիճակում։
Ինչպես գրում են ԶԼՄ-ները, կինն Ուզբեկստանի քաղաքացի է: Եթե նա մեղսունակ ճանաչվի, ապա նրան երկարաժամկետ ազատազրկում է սպառնում։
