ԵՐԵՎԱՆ, 14 հունիսի — Sputnik. Ռուսաստանի նախագահ Վլադիմիր Պուտինը հունիսի 20-ին Պետերբուրգում առանձին հանդիպումներ կունենա Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ, այնուհետև Ղարաբաղի հարցով եռակողմ հանդիպում տեղի կունենա, հայտնել է ՌԴ նախագահի օգնական Յուրի Ուշակովը։
«Պետերբուրգում հունիսի 20-ին նախատեսվում է եռակողմ բանակցություն անցկացնել Ռուսաստանի, Հայաստանի և Ադրբեջանի նախագահների հետ Լեռնային Ղարաբաղի կարգավորման հայտնի խնդրի շուրջ։ Ենթադրվում է, որ սկզբում Պուտինը առանձին հանդիպումներ կունենա Սարգսյանի և Ալիևի հետ, այնուհետև արդեն երեք նախագահները բանակցություններ կանցկացնեն միասին», — ասել է Ուշակովը։
«Բնականաբար, մեր կողմից հակամարտության կարգավորմանն աջակցելու ակտիվ փորձ կձեռնարկվի։ Մենք արդեն, ես կասեի, որոշիչ դեր ենք խաղացել ռազմական գործողությունների դադարեցման հարցում», — ավելացրել է նախագահի օգնականը։
«Այժմ մենք պատրաստ ենք շարունակել մեր միջնորդական առաքելությունը, բնականաբար, ԵԱՀԿ ՄԽ համանախագահող մյուս երկրների հետ համագործակցությամբ և հիմնվելով այն սկզբունքների վրա, որոնք շարադրված են 2009-2013 թվականներին Ռուսաստանի, ԱՄՆ-ի և Ֆրանսիայի նախագահների համատեղ հայտարարության մեջ… Մեր կողմը ամենաակտիվ և շահագրգիռ բանակցություններն է վարելու», — ասել է նա։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
