ԵՐԵՎԱՆ, 30 դեկտեմբերի — Sputnik. «Կրասնոդար» հեռուստաալիքն իր տոնական թողարկումը նվիրել է վարորդ Արմենակ Մովսիսյանին, որը բնակվում է Կրասնոդարում և N34 երթուղային տաքսու վարորդ է աշխատում։
«Մենք պատմել ենք ռահվիրաների, տարբեր մրցույթների հաղթողների և ուղղակի անսովոր մարդկանց մասին, որոնք կրասնոդարցիների կյանքն ավելի հետաքրքրիր են դարձնում։ Այսօր առաջարկում ենք հիշել երթուղային տաքսու բարի վարորդին։ Արմենակ Մովսիսյանը վերջերս է տեղափոխվել Հայաստանից և արդեն դարձել է քաղաքացիների սիրելին»,- ասվում է հեռուստաալիքի սյուժետում։
Տղամարդը հայտնի է դարձել ապագա մայրերի նկատմամբ իր հարգալից վերաբերմունքի շնորհիվ։ Նա սկզբունքորեն գումար չի վերցնում հղի կանանցից, միաժամանակ, «հետաքրքիր դրության» ոչ մի ապացույց չի պահանջում։
Արմենակը նման որոշում է ընդունել այն բանից հետո, երբ մի անգամ հղի ուղևորը խնդրել է զեղչել իր ուղեվարձը։ Շուտով զեղչը հարյուր տոկոսանոց է դարձել, իսկ հոգատար վարորդը դարձել է սոցցանցերի աստղ։ Նրան նկատել է «Կրասնոդար» հեռուստաալիքի նկարահանող խումբը։
Մովսիսյանը շնորհավորել է իր բոլոր ուղևորներին Ամանորի կապակցությամբ.
«Սիրելի կրասնոդարցիներ և մեր քաղաքի հյուրեր։ Շնորհավորում եմ ձեզ Ամանորի առթիվ։ Մաղթում եմ ամենայն բարիք նոր տարում։ Մաղթում եմ, որպեսզի մեր մայրերն ավելի շատ երեխաներ ունենան, որովհետև երեխաները մեր ապագան են։ Մենք չենք կարող ապրել առանց նրանց, նրանք մեր ուրախությունն են։ Իսկ ես, ինչպես և խոստացել եմ, պարտավոր եմ մինչև կյանքիս վերջը անվճար տեղափոխել ձեզ»,- ասել է Մովսիսյանը։
Նյութի ռուսերեն տարբերակը
