ԵՐԵՎԱՆ, 1 փետրվարի — Sputnik. «Ты супер!» աննախադեպ վոկալային մրցույթը` ՆՏՎ հեռուստաընկերության և Sputnik միջազգային տեղեկատվական գործակալության համատեղ նախագիծը, կսկսվի փետրվարի 11-ին։
Նոր նախագիծը հնարավորություն կտա ծնողական խնամքից զրկված տաղանդավոր երեխաներին՝ ելույթ ունենալ մեծ բեմում։ ՆՏՎ-ի գլխավոր պրոդյուսեր Տիմուր Վայնշտայնը համոզված է, որ մրցույթին մասնակցելը կյանքի ուղեգիր կդառնա պատանի երգիչների համար.
««Ты супер!»-ը ՆՏՎ-ի համար անսովոր նախագիծ է, որը շարունակում է հեռուստաալիքի եթերում տեղի ունեցող փոփոխությունների շարքը։ Մենք հասկանում ենք, որ ի զորու ենք օգնել այն երեխաներին, որոնք մինչև այդ պահն իրենց տաղանդը մեծ լսարանին ցույց տալու հնարավորություն չեն ունեցել»։
Վայնշտայնը խոստացել է, որ երիտասարդ տաղանդների հետ համագործակցությունը չի սահմանափակվի այս նախագծով։ Հայտնի է, որ ժյուրիի կազմում ընդգրկված է համաշխարհային մակարդակի երաժշտական պրոդյուսերներից մեկը` Իգոր Կրուտոյը։ Նա եղել է «Նոր ալիք», «Տարվա երգ» և այլ խոշոր երաժշտական նախագծերի պրոդյուսերը։ Կրուտոյը երեխաների համար կդառնա ոչ միայն խիստ դատավոր, այլ նաև բարի հրաշագործ։
«Ты супер!» երաժշտական շոուի եզրափակիչ անցած երեխաները կմասնակցեն մանկական «Նոր ալիքին» և կանցնեն մանկական «Եվրատեսիլի» եզրափակիչ ընտրական փուլ։ ՆՏՎ հեռուստաալիքը մրցույթի ավարտից հետո երեխաների մեծամասնության հետ կբեմադրի և եթերում կցուցադրի «ՇԿԻԴ հանրապետությունը» մյուզիքլը։
Մրցույթի պրեմիերային մնացել են հաշված օրեր։ Վոկալիստների ամեն րոպեն հաշված է։ Նրանց համար առաջին փորձությունը կդառնա ժյուրիի անդամների, ստուդիայի հյուրերի և միլիոնավոր հեռուստադիտողների առջև ելույթ ունենալը։ Հիմա նրանք անհայտ տղաներ ու աղջիկներ են, բայց շուտով նրանց մասին կխոսեն ոչ միայն Ռուսաստանում, այլ նաև հետխորհրդային տարածքի երկրներում։ «Ты супер!» երաժշտական շոուի պրեմիերան տեղի կունենա ՆՏՎ հեռուստաալիքի եթերում՝ փետրվարի 11-ին ժամը 20։00-ին։ Եթերները կհեռարձակվեն Sputnik-ի կայքերում։