ԵՐԵՎԱՆ, 11 հունվարի — Sputnik. ՆՏՎ հեռուստաալիքի և Sputnik տեղեկատվական գործակալության համատեղ «Ты супер!» նախագծի մասնակից Անգելինա Պապիկյանը ժյուրիի միաձայն քվեարկությամբ անցավ հաջորդ փուլ:
«Ты супер!» նախագծի մասնակից Անգելինա Պապիկյանը Գյումրու Ֆ.Նանսենի անվան երեխաների հատուկ խնամքի կենտրոնի սան է:
Փետրվարի 11-ին տեղի ունեցավ մրցույթի պրեմիերան, որի շրջանակներում նաև ելույթ ունեցավ Անգելինան: Ռուսերենին վատ տիրապետելու պատճառով, Անգելինայի թարգմանիչը բոլորի համար անսպասելիորեն դարձավ հումորի վարպետ Գարիկ Մարտիրոսյանը, ով աղջկան հենց բեմում փափուկ խաղալիք նվիրեց:
Հեռուստանախագծի մասնակցին գնահատում է չորս մարդուց բաղկացած ժյուրին, որի կազմում էին ՌԴ առաջատար երաժիշտներ և պրոդյուսերներ: Այդ թվում` Յոլկան և երգիչ Ստաս Պիեխան, երաժշտական պրոդյուսեր Վիկտոր Դրոբիշն, ինչպես նաև օպերային և էստրադային երգչուհի Մարգարիտա Սուխանկինան:
Դրոբիշի խոսքով` քիչ էր մնում ինքն ուշացներ սեղմել կոճակը, որովհետև ընկղմել էր երգի մեջ:
«Ինչ կարելի է ասել մի մարդու մասին, ում անձնական թարգմանիչն է Գարիկ Մարտիրոսյանը: Գեղեցկուհի: Հուսանք, որ նա շարունակելու է հուզմունքով պայքարել», — կատակեց Դրոբիշը:
Մարգարիտա Սուխանկինայի խոսքով` շատ ցավալի է, որ նման գեղեցիկ աղջիկը, որը մարմնավորում է հայկական մշակույթը, վատ է խոսում ռուսերեն:
«Նրա ձայնի հզորությունը գերում է միանգամից: Միակ բանը, ինչը մտահոգում է, թե ինչպես ենք համագործակցելու հետագայում: Պետք է սկսել ռուսերեն սովորել», — ասաց Սուխանկինան` հույս հայտնելով, որ Անգելինան կկարողանա հաղթահարել լեզվային խոչընդոտը:
Երգչուհի Յոլկան ամենաառաջինը սեղմեց կոճակը:
«Սա այնքան ուժեղ ձայն է, առաջին իսկ նոտաներից ամեն ինչ պարզ էր», — խոստովանեց նա:
Ստաս Պիեխան, իր հերթին, հիացած էր հայ մասնակցի գեղեցկությամբ:
«Ես ապշած էի Անգելինայի գեղեցկությամբ: Տատանվում էի նրա ելույթի ժամանակ, սակայն պետք է անպայման երկրորդ հնարավորությունը տալ, հատկապես նման տվյալների առկայության պարագայում», — ընդգծեց Պիեխան:
«Ты супер!» նախագիծը ՆՏՎ հեռուստաալիքի և Sputnik միջազգային տեղեկատվական գործակալության համատեղ նախագիծն է, որը հնարավորություն է տալիս ծնողական խնամքից զրկված տաղանդավոր երեխաներին՝ հայտնել իրենց մասին։ Մրցույթի 92 մասնակիցները Ռուսաստանից, Աբխազիայից, Ադրբեջանից, Հայաստանից, Բելառուսից, Վրաստանից, Ղազախստանից, Ղրղըզստանից, Մոլդովային, Ուկրաինայից, Էստոնիայից և Հարավային Կորեայից են։ Հայաստանը միջազգային երգի մրցույթում կներկայացնեն երկու մասնակից` Անգելինա Պապիկյանն ու Սաբինա Մանվելյանը։ Sputnik-ն իր ընթերցողներին հնարավորություն է տալիս հետևել մասնակիցների հաջողություններին առցանց օրագրերի և ուղիղ հեռարձակումների ձևաչափում։
