ԵՐԵՎԱՆ, 2 մարտի — Sputnik. «Վոլգոգրադ-Վոլժսկի» երթուղով ընթացող №123 ավտոբուսի վարորդ Ուսուբ Քոչոյանը հայտնի դարձավ 2012 թվականին, երբ ուղևորների հետ նրա հարաբերությունների մասին գրեցին Վոլգոգրադի ԶԼՄ-ները, գրում է «Նովոյե վրեմյա» հայկական պարբերականը։
Ուսուբը մեծ զեղչեր է անում այն ուղևորներին, որոնք ավտոբուս նստելուց ողջունում և ժպտում են նրան։
«Աշխարհում ամենաուժեղ գործիքը ժպիտն է». նման գրություն է փակցված նրա «գազելում»։ Նա նաև անվճար տեղափոխում է հղիներին, զինվորներին և գերազանցիկ աշակերտներին ու ուսանողներին։
Բացի այդ, 2002 թվականին Վոլգոգրադ տեղափոխված Ուսուբ Քոչոյանը իր ուղևորներին տնական կարկանդակ է հյուրասիրում։
2016 թվականի ԶԼՄ-ների հրապարակումները ճանաչում բերեցին նաև Արմենակ Մովսիսյանին` Կրասնոդարից։ Նա սկզբունքորեն գումար չի վերցնում ապագա մայրիկներից։ Դրա համար տեղի բնակիչները նրան «քաղաքի ամենաբարի վարորդ» են անվանում։
Տղամարդը դադարեց հղի կանանցից գումար վերցնել, երբ մի օր կինը խնդրեց զեղչել երթևեկության տոմսի գինը։
Երթուղային տաքսու ևս մեկ հայ վարորդ հայտնի է դարձել Սերգիև Պոսադ ռուսական քաղաքում։ 52-ամյա Սամվել ձյաձյան, ինչպես ինքն է իրեն անվանում, անվճար տեղափոխում է գերազանցիկներին։ Վարորդն անվճար տոմս է երաշխավորում ցանկացած առարկայից հինգ ստացած յուրաքանչյուր աշակերտի։
Չորս ստանալու դեպքում Սամվել ձյաձյան տոմսի կես գինն է վերցնում։ Ինչպես նշում են տեղական ԶԼՄ-ները`վարորդի այս քայլից հետո հինգերի քանակը դպրոցներում կտրուկ ավելացել է։ Ու քանի որ հինգ ստանալու և անվճար երթևեկելու ցանկություն ունեցողների թիվն աճում է, լրագրողների կարծիքով, նման մարդկանց կարիք ունի «կրթության նախարարությունը»։