ԵՐԵՎԱՆ, 7 մարտի — Sputnik. Հայերը ժամանակակից Ազովի տարածքում են հայտնվել XIII դարում և արհեստի ու առևտրի հին ավանդույթների շնորհիվ շատ առումներով նպաստել են միջնադարյան քաղաքի բարգավաճմանը։ Հայ արհեստավորների պատրաստած իրերից շատերը կարելի է տեսնել Ազովի թանգարան-արգելոցում, հաղորդում է «Ёрш.Азов» պորտալը։
«Հայկական արվեստը դարձել է Ոսկե հորդայի կիրառական արվեստի կարևոր մասը։ Հայ համայնքն Ազակում ունեցել է իր եկեղեցին` սուրբ Գրիգոր Լուսավորիչը», —պատմել է Ազովի թանգարանի հնագիտության բաժնի վարիչ Անդրեյ Մասլովսկին։
Նրա խոսքով` Ազակում հայ գրագիրներ են աշխատել։ «Երևանի Մատենադարանում մինչ օրս պահվում են գրքեր, որոնք գրել են Ազակի հայ գրագիրները», — պատմել է գիտնականը։
Նա նշել է, որ հայկական եկեղեցիներ են այցելել նաև թյուրքերը։ Դրա վկայությունն է թյուրքական «բայ» բառը, որն օգտագործվել է որպես ուղերձ առ աստված։ «Ամենայն հավանականությամբ, հայ համայնքը ոչնչացվել է 1395թ-ին Թեմուրի արշավանքի ժամանակ։ Ողջ մնացած հայկական ընտանիքները տեղափոխվել են Ղրիմի քաղաքներ», — ասել է Մասլովսկին։ Գիտնականը չի բացառում, որ Դոնի միջնադարյան հայերի շարքում կան Ազակի բնակիչների հետնորդներ։
