ԵՐԵՎԱՆ, 17 ապրիլի — Sputnik, Լաուրա Սարգսյան. Ռուսաստանի քաղաքացի Մուրատ Ուելդանով-Գալուստյանին դատավարությունը նախատեսված է ապրիլի 26-ին Բաքվում։ Մարատի քրոջը՝ Մարիաննա Միրզոյանին, անհանգստացնում է եղբոր ճակատագիրը։
«Նա ստամոքսի խնդիրներ ունի և բանտում վատ է զգում։ Նրան պետք է ազատ արձակել, նա անմեղ է, հակառակ դեպքում ես ծայրահեղ միջոցների կդիմեմ։ Եթե պետք լինի, կմեկնեմ Բաքու», — Sputnik Արմենիայի թղթակցին ասաց Միրզայանը ։
Նրա խոսքով՝ Մարատը մեկուսարանից նամակ է գրել և խնդրել է այն փոխանցել Բաքվում Ռուսաստանի դեսպանատան հյուպատոսական բաժին։ Սակայն նամակը դեռ չի հասել հասցեատիրոջը։ Նամակում Մարատը հանդիպում է խնդրել հյուպատոսական բաժնի ներկայացուցիչների հետ։ Գալուստյանի փաստաբանը վախենում է նրա շահերը պաշտպանել, այդ պատճառով էլ չեզոք դիրք է բռնել:
Ռուսաստանի քաղաքացի, ծագումով հայ Մարատ Ուելդանով-Գալուստյանին արդեն 11 ամիս է՝ պահում են Ադրբեջանի Անվտանգության պետական ծառայության մեկուսարանում՝ մեղադրելով թմրամիջոցների պահման, շրջանառության և տեղափոխման մեջ։
Նա ձերբակալվել է 2016 թ-ի հունիսի 9-ին։ Ձերբակալությունից մի քանի օր անց դեսպանատուն է դիմել քաղաքացի Մարիաննա Միրզոյանը՝ հայտնելով, որ ձերբակալվածն իր եղբայրն է, իսկական ազգանունը Գալուստյան է, և նա ձերբակալվել է ոչ թե թմրանյութերի ապօրինի շրջանառության, այլ լրտեսության կասկածանքով։
Մարատ Ուելդանովը Ադրբեջանում մեկ տարուց ավելի աշխատել է ավստրիական «Do&Co» ընկերությունում, որը զբաղվում է հյուրանոցային բիզնեսով: Քանի որ նրա անձնագրում նշված է ոչ թե իր հայկական ազգանունը, այլ՝ կնոջ, Բաքվում երբեք չի հայտնվել ուշադրության կենտրոնում: Մարատը 1990-ականներից Ռուսաստան էր տեղափոխվել Բաքվից՝ իր ընտանիքի հետ:
Մարատի ձերբակալության մասին քույրն իմացել է նրա գործընկերոջից՝ Ելենա Մակարենկոյից, որին նույնպես ձերբակալել էին 15 օրով և պահել մեկուսարանում միայն այն բանի համար, որ նա Մարատի հետ գործնական հարաբերություններ է ունեցել։ 2016թ-ի օգոստոսի 17-ին Ռուսաստանի ԱԳՆ ներկայացուցիչ Մարիա Զախարովան մեկնաբանել է իրավիճակը` հայտարարելով, որ Ռուսաստանի ԱԳՆ-ն ազգային ենթատեքստ չի տեսնում Մարատ Ուելդանով-Գալուստյանի ձերբակալության մեջ։
