ԵՐԵՎԱՆ, 25 ապրիլի — Sputnik. Հայկական հյուրընկալություն, համեղ խոհանոց, տաք եղանակ ու լեռներ` ահա թե ինչ է սպասվում ձեզ Երևանում, և եթե դուք մի քանի ազատ օր ունեք՝ մեկնեք այնտեղ, խորհուրդ է տալիս ռուս բլոգեր Եկատերինա Գարանինան «Ռուս բլոգեր» պորտալում։
«Երևանն իր ողջ շքեղությամբ տեսնելու համար մայրամուտին այցելեք Կասկադ, բարձրացեք վերև։ Դուք կտեսնեք, թե ինչպես արևի ճառագայթների ներքո քաղաքը վարդագույն տեսք է ստանում»,- գրում է Գարանինան։
Նրա խոսքով` Երևանը կանաչ քաղաք է, բացի այդ, այնտեղ տաք է։
«Տեղի բնակիչները շատ են սիրում զբոսնել։ Ի տարբերություն Ռուսաստանի, հայերը զբոսնում են նույնիսկ հին եկեղեցիների մերձակայքում։ Մարդիկ երաժշտություն են լսում, պարում, շներին զբոսանքի տանում, պարզապես զմայլվում քաղաքով, վազում… Եվ այդպես` մինչև կեսգիշեր։ Երեկոյան ժամը 7-8-ի սահմաններում Հանրապետության հրապարակում սկսվում է երգող շատրվանների շոուն։ Ջրի ցայտերը որոշակի տեմպով շարժվում են դասական և ժամանակակից երաժշտության ներքո։ Տպավորիչ տեսարան է»,- գրում է ռուս զբոսաշրջիկը։
Երևանը, նրա կարծիքով, զերծ է պաթոսից։ Այստեղ նույնիսկ եվրոպական սրճարաններն ու Հյուսիսային պողոտայում գործող թանկ խանութները միահյուսվում են քաղաքի պարզությանը։ Հայկական խոհանոցին կարելի է առանձին գլուխ նվիրել, կարծում է հեղինակը։
«Այստեղ հեշտությամբ կարող ես քեզ երջանիկ զգալ և գիրանալ։ Ուտեստների մեծ չափաբաժիններ և մատչելիություն։ Օրինակ, կախված կոնկրետ հաստատությունից՝ երկուսով կարելի է ճաշել 700-800 ռուբլով` պատվիրելով 5-6 ուտեստ։ Այստեղ սրճարանների լավ ցանցեր կան, որտեղ ձեզ կմատուցեն գինի և 7 տեսակ խորոված, գրիլ և այլն։ Կան նաև պանդոկներ։ Փողոցում կարելի է տեսնել մի շարք տաղավարներ, որտեղ թխվածք են վաճառում։ Երևանում փորձեք ամեն ինչ, ինչ կցանկանաք. տոլմա, փլավ, չիր, պանիր, պիցցա (այստեղ այն պատրաստում են տեղական պանրով)։ Միայն թե՝ զգույշ եղեք, չափաբաժինները մեծ են»,- գրում է Գարանինան։
Երևանը քաղաք է, որն արժե տեսնել սեփական աչքերով, եզրափակում է նա։
