ԵՐԵՎԱՆ, 28 ապրիլի — Sputnik. Մոսկվայի հյուսիս-արևմուտքում գտնվող գրադարանի այցելուները կկարողանան ծանոթանալ մեծն հայ բանաստեղծ Հովհաննես Թումանյանի արվեստին, գրում է «Խորոշևո Մնևնիկի» առցանց թերթը։
Այստեղ ապրիլի 29-ին «Անհուն հանքը իմ գանձերի, սիրտս է առատ, լեն ու ազատ» երեկոյի շրջանակում կխոսվի հայ բանաստեղծ, հրապարակախոս և հասարակական գործիչ Թումանյանի կյանքի ու արվեստի մասին։
Երեկոյի հատուկ հյուրերը կլինեն «Հայորդաց տուն» լուսավորչական կենտրոնին կից «Ծիրանի» համույթի դուդուկահարները։
«Դուդուկի նվագը հայ ժողովրդի մշակութային կյանքի անբաժանելի մասն է։ Երկար ժամանակ այդ գործիքը հայերի կյանքի ամենակարևոր հասարակական իրադարձությունների ուղեկիցն է եղել։ Եվ մեզ համար հատկապես հաճելի է, որ այդ գեղեցիկ ու ինքնատիպ երաժշտությունը կհնչի նաև մեր գրադարանում կազմակերպված երեկոյի հյուրերի համար», — ասել է №225 գրադարանի վարիչ Օքսանա Միտրոֆանովան։
Միջոցառմանը կհաջորդի հանդիպումների շարք` էթնոմշակութային երկխոսության ձևաչափով։
